மனோ-தத்துவம்

Conviction (2010) - தியாகம், போராட்டம் மற்றும் சட்டம்!

2011-10-10T10:05:00.002+05:30

அண்ணன் - தங்கை சென்டிமென்ட்! வேறெந்த சினிமாக்களையும் விட தமிழ் சினிமாவில் இதைக் கருவாகக்கொண்டு கொஞ்சம் அதிகமாகவே படங்கள் வந்திருக்கும் என்று நினைக்கின்றேன். 'T.R' க்குத்தான் நன்றி சொல்லவேண்டும். இவருக்கு பேட்டி கொடுப்பதை விட அதிகமாக பிடிச்ச விஷயம் அண்ணன்‍ ‍ தங்கை சென்டிமென்டாகத்தான் இருக்கும். அந்த அளவுக்கு படங்களை எடுத்துத் (படுத்தித்) தள்ளியிருக்கிறார். என‌க்குத் தெரிந்து அண்ணன் தங்கை சென்டிமென்டையே கருவாக கொண்ட‌ பட‌ங்களில் கிழக்குச் சீமையிலே , முள்ளும் மலரும் ( இந்த தலைப்பே ஒரு கவிதை. அதைப்பற்றி எனது முன்னைய பதிவு) போன்ற படங்கள் என்னை மிகக் கவர்ந்தவை.

ஆனால் என்ன... மேலே சொன்ன‌ அனைத்து தமிழ்ப்படங்களிலுமே கதைக்க‌ரு ஒன்றாகத்தான் இருக்கும். சுருக்கமாக சொல்வதென்றால் அண்ணன் அல்லது த‌ங்கை திருமணம் செய்வதால்/செய்வதற்கு ஏற்படும் மன/பணப் பிரச்சினை! தமிழ் சினிமா இந்த வட்டத்தை விட்டு வெளியில் வந்தது குறைவு. ஆனால் நிஜவாழ்வில் இதைத் தவிரவும் எத்தனையோ வித்தியாசமான பாதைகளில் அண்ணன்‍‍ தங்கை உறவு பயணிக்கச்செய்கின்றது. அப்படியான ஒரு பாதையில் பயணித்த ஒரு உண்மைக்கதையை தழுவி எடுக்கப்பட்ட படம் தான் இந்த 'Conviction'!

படம் பார்க்கும் வரை இப்படத்தைப் பற்றி ஒன்றும் எனக்கு தெரியாது, பட இயக்குனர் 'Tony Goldwyn' உட்பட. அப்படி இருந்தும் இப்படத்தை நான் தெரிவு செய்தமைக்கு ஒரே காரணம் 'Hilary Swank'! ஏற்கனவே இவரின் 'Million Dollar Baby' படத்திலேயே இவரின் நடிப்பு வெகுவாக கவர்ந்திருந்தாலும், 'சே..சான்ஸே இல்லப்பா, இனி இவட படத்த மிஸ் பண்ணக்கூடாது' என எண்ணத்தை தோற்றுவித்த, நான் பார்த்த இவரின் இரண்டாவது படம் 'Boys Don't Cry'!. இந்தப்படம் இவரின் அறிமுகப்படம். படம் முழுக்க 'Sexual Identity Crisis' பிரச்சினையால் ஆணைப்போலவே ஒப்பனை செய்துக்கொண்டு, ஊரை ஏமாற்றி திரிவார். படம் தொடங்கி 20, 30 நிமிடங்களில் நீங்களும் அவர் ஒரு பெண் என்பதை மற‌ந்து விடுவீர்கள். அதுதான் 'Hilary Swank' இன் வெற்றி. முதல் படத்திற்கே ஆஸ்கார் வாங்கியவர்.('Million Dollar Baby'க்கும் ஆஸ்கார் வாங்கியிருக்கிறார்). இந்தப்படத்தை பற்றியும் ஒரு பதிவு போடலாமென என எண்ணியுள்ளேன் (உங்கள எல்லாம் ஒரு வழிப்பண்ணாம விடப்போறதில்ல‌). சரி இனி படத்திற்கு வருவோம்.

படத்தின் ஆரம்பக்காட்சியிலேயே ஒதுக்குப்புறமான வீட்டினுள் கொடூரமாக கொலை செய்யப்பட்டு கிடக்கின்றார் ஒரு பெண் (Mrs. Brow). தூரத்தே மரவேளை செய்துக்கொண்டிருக்கும் 'Kenny Waters'இன் நக்கலான பேச்சு + வைத்திருக்கும் ஆயுதம் + முகத்தின் கீறல்கள் அவர் மேல் சந்தேகத்தை வரவழைக்க விசாரனைக்கு அழைத்துச்செல்லப்பட்டு பின்னர் ஆதாரமில்லாது விடுவிக்கப்படுகின்றார். ஆனால் அதே கொலைக்காக இரண்டு வருடம் கழித்து மீண்டும் கைது செய்யப்படுகின்றார். ஆனால் இம்முறை அவர் சற்றும் எதிர்பாராதவிதமாக சாட்சிகள் அவருக்கு எதிராக இருக்க ( அவர் மனைவி உட்பட) ஆயுள் தண்டனை கிடைக்கின்றது. கொலைக்கு முக்கிய தடயமாக கருதப்படுவது, 'Mrs. Brow' இன் வீட்டில் கிடைக்கும் இரத்தமாதிரியின் வகுப்பும், 'Kenny'இன் குருதி வகுப்பும் ஒத்துப்போவதுதான் (கவனிக்க: கதை 1983 காலப்பகுதியில் நடப்பதால் அப்போது 'DNA' வசதிகள் இல்லை).

ஆனால் தன் அண்ணனை முழுதாக நம்பும் 'Betty' தானே வழக்கறிஞராகும் முயற்சியில் சட்டக்கல்லூரியில் சேர்கிறார். கணவனும் பிரிந்துவிட்ட‌ நிலையில் இரண்டு மகன்களையும் வைத்துக்கொண்டு பெரும் போராட்டத்தின் பின் 18 வருடங்களின் பின் தனது நண்பி 'Alba Rice' இன் உதவியோடு 'DNA' வசதிகளை பயன்படுத்தி தன் அண்ணனை விடுவிப்பது தான் கதை!

இது 1983இல் நடந்த ஒரு உண்மைக்கதையை தழுவி எடுக்கப்பட்ட படம். குடும்ப உறவுகளுக்கிடையில் இருக்கவேண்டிய நம்பிக்கை, தியாக உணர்வுகளை சிறப்பாக சொல்லும் ஒரு படம்.

படத்தின் மிகப்பெரிய பலம் 'Betty'யாக வரும் 'Hilary Swank' ! தீர்க்கமான‌ தங்கை, பொறுப்பான‌ தாய், ஆதரவு தேடும் நண்பி என்று எல்லா பாத்திரமாகவும் மாறிவிடுகிறார். கண்களில் இழையோடும் சோகத்துடன் அந்த போலிச்சிரிப்பு ஒன்றே மனதை ஏதோ செய்கிறது.

அடுத்து 'Kenny'யாக வரும் 'Sam Rockwell'. முரட்டுத்தனமும் , சேட்டைத்தனமும் கல‌ந்த கதாபாத்திரமாக! நைட் கிளப்பில் ஒருவரை முரட்டுத்தனமாக தாக்கிவிட்டு அடுத்த நிமிடத்திலே கூலாக ஒரு நிர்வாணமாக ஆட்டம் ஆடும் கேரக்டர். (இருந்தாலும் அந்த காட்சி கொஞ்சம் ஓவர். அதுவும் சொந்த தங்கையின் முன்னால் நிர்வாணமாக, சகிக்கவில்லை). இவருக்கும் 'Hilary Swank'க்கும் இடையிலான அந்தக் கெமிஸ்ட்ரி படத்திற்கு நன்றாகவே உதவியிருக்கின்றது. ஜெயில் காட்சிகளில் அசத்துகிறார். தவறாக தீர்ப்பு வழங்கப்பட்ட ஒரு ஆயுள்தண்டனை கைதியின் விரக்தியையும் கோபத்தையும் நன்றாகவே பிரதிபலிக்கிறார்.சில காட்சிகளில் இவர் சந்தோஷத்தில் துள்ளிக்குதிக்கும்போது அந்த சந்தோஷம் நம்மையும் தொற்றிக்கொள்ளுகின்றது.

இவர்கள் இருவரைத்தவிர இவர்களது தாய், 'Betty'இன் நண்பி, மகன்கள், 'Kenny'இன் மனைவி, மகள்,என அனைத்து பாத்திர‌த்தெரிவுகளும் அவர்களின் நடிப்பும் நிறைவாக இருக்கின்றது.

படத்தின் இடையிடையே வரும் 'Kenny, Betty'இன் குழந்தைப்பருவத்து காட்சிகள் கதையோட்டத்திற்கு நன்றாகவே உதவியிருக்கின்றன. இக்காட்சிகளில் குழ‌ந்தைப்பருவத்திலிருந்தே இருவருக்குமுள்ள நெருக்கமும் புரிந்துணர்வும் காட்டப்படுவதால் படத்தின் இறுதிவரை போராடும் 'Betty' பார்க்க நமக்கு நெருடலாக இல்லை. அத்தோடு சிறுவயதிலேயே இருவரும் வீட்டினுள் அடிக்கடி கள்ளததனமாய் நுழைவது பிறகு இன் மேல் சந்தேகம் வலுப்பெற முக்கிய காரணமாகிறது.

படத்தில் எனக்கு நெருடலாக இருந்த விஷயங்கள். ஒன்று கணவனும் பிரிந்துவிட்ட நிலையில் ஒரு பாரில் பகுதி நேரமாக வேலைசெய்து கொண்டு வரும் வருமானத்தில் சட்டக்க‌ல்லூரியிலும் படித்துக்கொண்டு இரண்டு மகன்களையும் வளர்ப்பது. (இவர்கள் இருவரும் ஏதொ செல்வந்தர் வீட்டில் வளர்வது போன்றுதான் காட்டப்படுகிறது) மற்றது கணவனுக்கு எதிராக சாட்சி சொல்லும் மனைவி. இருவருக்குமிடயில் எதுவும் பிரச்சனை இருப்பதாக காட்டவில்லை. ஒரு போலிஸ் அதிகாரி மிரட்டியதற்காக முன்னாள் காதலி பொய் சாட்சி சொல்வது OK. ஆனால் சொந்த மனைவி?

இவ்வாறான 'Drama' வகையறாப்படங்களிற்கு மிகப்பெரிய பலமாக இருப்பது படத்தின் வசனங்கள். இந்தப்படத்திலும் அப்படியே. பல இடங்களில் வசனங்களே பலக் காட்சிகளை நியாப்படுத்துகின்றன. குறிப்பாக சாட்சிகளை பொய்யாக சோடிப்பதற்கு 'Nancy Taylor' கூறும் காரணம் "Once I get my lead, I never let it go."! 'Kenny Waters' ஐ விடுதலை செய்ய‌ 'DNA' சாட்சியை விட‌ இன்னுமொரு சாட்சி தேவைபடும்போது வரும் வசனம் "Because people don't like to admit when they've made a mistake"! இவற்றைவிட படத்தின் இறுதிக்காட்சியில் விடுதலை செய்யப்பட்ட 'Kenny', 'Betty'இடம் பேசும் வசனம். "Even if it had taken you another 20 years or so, I would've been okay knowing you were out here, working so hard for me, knowing that you loved me that much". மனதை கனக்கவைக்கும் இந்த டயலாக்கோடு படம் முடிகிறது.

மொத்தத்தில் அருமையான நடிப்புடன் கூடிய ஒரு 'Biography' படம் மற்றும் வித்தியாசமான கதைக்களத்தில் சொல்லப்பட்ட ஒரு அண்ணன் தங்கை சென்டிமென்ட் படம் என இரண்டு மாங்காய்களை ஒரே கல்லில் அடிக்க ஆசைப்படுகிறீர்களா? நீங்கள் பார்க்கவேண்டிய படம் 'Conviction'!

படத்திற்கு வெளியே...
# உண்மையான 'Betty' படத்தை பார்த்துவிட்டு பின்வருமாறு கூறியிருக்கிறார்
"The movie is so true to life. Not every scene happened, but every emotion happened."

# உண்மையிலேயே 'Kenny' விடுதலை செய்யப்பட்டு ஆறு மாதத்தில் ஒரு விபத்தில் காயமுற்று பின் இறந்திருக்கின்றார். ஆனாலும் இது படத்தில் சொல்லப்படவில்லை.

உண்மையான Kenny and Betty

படத்தைப் பற்றி மேலதிக தகவல் மற்றும் Trailer
நன்றி - IMDB

மங்காத்தாடா...!

2011-09-04T09:40:00.002+05:30

தமிழில் , அதுவும் ஒரு மாஸ் ஹீரோவிடம் ஒரு படம் முழுக்க நீ கெட்டவனாக நடிக்கவேண்டும் என்று இதற்கு முன் மூன்றே மூன்று படங்களை இயக்கியிருக்கும் ஒரு இளம் இயக்குனர் கேட்டால், அதுவும் அந்தப் படம் அந்த மாஸ் ஹீரோவின் 50ஆவது படமாக இருக்கும்போது... யாராவது தைரியமாக ஒத்துக்கொள்வார்களா..?

ஒத்துகொள்வார்... யார் 'அஜித்', படம் 'மங்காத்தா'..!

படத்தின் கதை ஒரே வரியில் : அஜித் அன்ட் கோ 500 கோடி பணத்தை கொள்ளையடிக்க போடும் திட்டமும் கொள்ளையடிப்பதும் முற்பாதி, கொள்ளைய‌டித்த பணம் படுத்தும் பாடு பிற்பாதி!

40 வயது, நரைத்த முடி, தாடி இவை எல்லாம் வேறு யாருக்கும் மைனஸாக இருக்கலாம். ஆனால் அஜித்திடம் இவை அனைத்தும் ப்ளஸாக இருக்கின்றது. அதுதான் அந்த கேரக்டரின் வெற்றி. அதிரடியாக சண்டை போடுவதிலும் விட சின்ன சின்ன மேனரிசத்திலே வில்லத்தனத்தை காட்டி அசத்துகின்றார். குறிப்பாக ஜெயப்ரகாஷை கடத்திவந்து (திரிஷாவை பார்த்துவிட்டு) காரிலிருந்து வெளியே தள்ளிய பின் விடும் அந்த லுக் - Class..! அத்தோடு சூப்பர் ஸ்டாரிற்கு பிறகு அஜித்தின் உதடுகளில் தான் அந்த சிகரட் கச்சிதமாக அம‌ர்கின்றது.

ஆனால் என்னதான் அஜித்தை ரசிக்க முடிந்தாலும் சண்டைகாட்சிகளும், நடனக்காட்சிகளும் இவரின் தொப்பையிடம் படும்பாடு கொஞ்சம் நெளியச்செய்த‌து. குறிப்பாக அந்த அறிமுக சண்டைக்காட்சி! என‌க்கென்னவோ அஜித்தின் அறிமுகக்காட்சியை விட அர்ஜுனின் அறிமுகக்காட்சி நன்றாக இருப்பதாகப்பட்டது.

அஞ்சலி, ஆன்ட்ரியா ‍இருவ‌ரும் இரண்டு பிளாக்மெயில் காட்சிகளுக்கு உதவியிருக்கிறார்கள். திரிஷாவுக்கு கூட பெரிதாக ஒன்றும் செயவதிற்கில்லை. லக்ஷ்மி ராய் தான் கடைசிவரை ஒரு 'காட்டு' காட்டுகிறார். ;-)

பிரேம்ஜி வழமைப்போலவே கிச்சு கிச்சு மூட்டுகிறார். குறிப்பாக அவரது நன்பனை லக்ஷ்மி ராய் போட்டுத்தள்ளிவிட‌ இவர் அடிக்கும் 'சிட்டி' ரக லூட்டிக்கு தியேட்டரில் சிரிப்பு வெடி. ஆனால் கிளைமாக்ஸ் ச‌ண்டைக்காட்சியில் இவர் புலம்பிக்கொண்டு திரிவது எரிச்சலூட்டியது. அடுத்த படத்தில் இதே கூட்டணி அலுப்புத் தட்டிவிடுமோ?

இடைவேளைக்கு பிறகு அடுத்தடுத்து வரும் திருப்பங்க‌ள் (Twists) சுவாரஷ்யம். ஹாலிவுட்டில் இம்மாதிரியான‌ 'Robbery' திரைப்படங்களில் வரும் திருப்பங்கள் மிக சுவாரஷ்யமாக‌வும் லாஜிக்காகவும் இருக்கும். மங்காத்தாவின் திருப்பங்களில் லாஜிக் கொஞ்சம் உதைக்கிறது. குறிப்பாக கடைசியில் வரும் அந்த Twist. ஏதோ இரண்டு காட்சிகளை காட்டி அதை விளக்குகிறார்கள். ஆனால் கொஞ்ச‌ம் ஆழமாக போனால் லாஜிக் உதைக்கிறது. ஆனாலும் சுவாரஷ்யமான திருப்பங்களுக்காக வெங்கட்பிரபுவிற்கு ஒரு பூச்செண்டு!

எதிர்பார்த்ததைப்போன்றே சில ஆங்கிலபடங்களின் பாதிப்பு ஆங்காங்கே தெரிகின்றது. குறிப்பாக 'Traffic Network Control'ஐ வைத்துக்கொண்டு வாகனங்களை டைவர்ட் செய்வது ஏற்கெனவே 'The Italian Job'இல் வந்தது.

கிளைமாக்ஸில் எங்கே 'போக்கிரி' படம் மாதிரி ஏதும் அஜித் நல்லவராகி விடுவாரோ என பயந்திருந்தேன். நல்ல வேளை அப்படி ஏதும் நடக்கவில்லை. அதற்காகவே இந்தப்படம் எனக்கு இன்னமும் பிடித்தது. மொத்தத்தில் 'மங்காத்தா' கிட்டத்தட்ட ஒரு ஆங்கிலப்படத்தை பார்த்ததைப் போன்றதோரு உணர்வைத் தந்தது.

மங்காத்தா - தல ஆடாமல் ஆடியிருக்கும் ஆட்டம்!

அதிகாலை அவஷ்தைகள்!

2011-06-12T09:56:00.001+05:30

10.00,10:01,10:02..சுவர்க்கடிகாரம் இரவை அளந்துக் கொண்டிருந்தது. இப்படியே கடிகாரத்தை பார்த்துக்கொண்டிருந்தால் தூக்கம் வந்துவிடுமாம் எப்போதோ அம்மா சொல்லித்தந்தது. சில நேரங்களில் நடப்பதுமுண்டு. ஆனால் இப்போது நடக்கவில்லை. மொபைலை எடுத்தேன். அலாரம் 3.45AM எனக்காட்டியது. எரிச்சலாக இருந்தது. ரொம்ப நாட்களுக்கு பிறகு அதிகாலையில் பயணம் செய்யவேண்டிய கட்டாயம். நான் அதிகாலையில் பயணம் போவது கங்குலி IPL விளையாடுவது மாதிரி. சரிப்பட்டே வந்ததில்லை. ஒன்று விடிய, விடிய தூக்கத்தோடு போராட்டமே நடத்த வேண்டியிருக்கும், இல்லை அலாரத்தையும் தாண்டி தூங்கிப் பின் அரக்க பறக்க புற‌ப்பட வேண்டியிருக்கும். எனக்கே தெரியாமல் அலாரத்தை Off செய்துவிட்டு தூங்கிய அனுபவங்கள் கூட உண்டு. நாளை எப்படியோ யோசித்துக்கொண்டே 'சிட்டி' ஐ தேடினேன்.கட்டிலுக்கு பக்கத்தில் நிம்மதியாக துங்கிக்கொண்டிருந்தது. ['சிட்டி' என்றால் ரோபோ அல்ல, எங்கள் வீட்டு நாய்.. உதிரித்தகவல்: அந்த சிட்டிக்கும் , இந்த சிட்டிக்கும் ஒரே ஒரு வித்தியாசம். அது என்ன சொன்னாலும் கேட்கும் , இது என்ன சொன்னாலும் கேட்காது ;-)] மீண்டும் கடிகாரத்துக்கே வந்தேன். கண்கள் இலேசாக செருகத்தொடங்கின.

*************

'வவ் , வவ் '... 'சத்தத்தில் விழித்தேன், 'சிட்டி' எதற்காகவோ குரைத்துக்கொண்டிருந்தது. தூக்கம் கலைந்தது. நேரம் 3.40AM . அலாரம் அடிக்க இன்னும் 5 நிமிடமே இருந்தது. 'சிட்டி'யை சந்தோஷத்துடன் பார்க்க அது என் காலை நக்கத்தொடங்கியது. தலைமாட்டில் வைத்த மொபைல், கட்டிலிக்கும் ,இடுப்பிற்குமிடையில் செருகி அவஷ்தைப்பட்டுக்கொண்டிருந்தது. எடுத்து அலாரத்தை 'Off' செய்து விட்டு வாழ்க்கையிலே முதன் முறையாக குறிப்பிட்ட நேரத்தில் ஒரு அதிகாலைப்பயணத்திற்கு ஆயத்தமாக தயாரானேன்.

*************

4.30AM. 'AXE'இன் நறுமணத்தை உடம்பில் வாங்கிக்கொண்டேன். 'AXE'ஐ பாவிக்கும் போதெல்லாம் அதன் T.V விளம்பரங்கள் கண் முன்னே வந்து செல்வதை தவிர்க்க முடிவதில்லை. கூடவே ஒரு சிரிப்பும் வரும். ;-)

ஒரு ஆனந்த விகடன், மொபைல் நிறைய MP3, கண்ணில் மிச்சமிருந்த தூக்கம்... நான்கு மணி நேர பயணத்தை ஓட்டிவிடலாம் என எண்ணிக்கொண்டே அறையை விட்டு வெளியே வந்தேன். வழமையாய் குண்டூசி சத்தத்திற்கே 'திடுக்கிட்டு' எழும் அம்மா இன்று அதிசயமாக தூங்கிக்கொண்டிருந்தார். எழுப்ப மனம் வரவில்லை. வாலை ஆட்டிக்கொண்டே 'சிட்டி' வாசல் வரை வந்தது. கதவை பூட்டிவிட்டு தெருவிற்கு இறங்கி நடக்க ஆரம்பித்தேன். அதிகாலையில் தெருவில் இப்படி ஆறுதலாக நடப்பது கொஞ்சம் வித்தியாசமான அனுபவமாக இருந்தது. 'சிட்டி'க்கு நன்றிச் சொல்லிக்கொண்டேன்.

**************

10 நிமிடத்தில் பஸ் நிறுத்தத்தை அடைந்தேன். காத்திருந்த 10 நிமிடத்தில் ரஜனியின் உடல்நிலையில் தொடங்கி சனத்தின் மனநிலை வரை மனம் பல விஷ‌யங்களை அசைப்போட்டுக்கொண்டிருந்தது. அத்தனையையும் துரத்தியடித்துக்கொண்டு 'இண்டர்சிட்டி எக்ஸ்பிரஸ்' வந்து நிறுத்திய போது நேரம் 5.00. ஏறினேன், எதிர்ப்பார்த்ததைப் போலவே இருக்கைகள் பல காலியாக இருந்தன. அதிகாலையில் பயணம் செய்வதில் இருக்கும் வசதிகளில் ஒன்று. ஜன்னலோர இருக்கையொன்றில் போய் இருந்துக்கொண்டேன். பக்கத்து இருக்கை காலியாக இருந்தது வசதியாக இருந்தது. முதல் வேலையாக‌ காதுகளில் 'ஹெட் செட்' டை செருகி, MP3 பிளேயரை தொடக்கினேன் 'வாழ்க்கை ஒரு போர்க்களம்...' என காதுகளில் கதறியது என்னவோ செய்ய 'ஹரிஷ் ஜெயராஜ்'க்கு தாவினேன். 'எங்கேயும் காதல் .. ' என இதமாக ஆரம்பிக்க அப்படியே சாய்ந்தேன். எல்லாமே சரியாக நேரத்திற்கு போய்க்கொண்டிருப்பது எங்கோ ஏதோ செய்தது.

****************

5 :05, 5 :10, 5 :15... கண்கள் மெதுவாக செருக ஆரம்பித்த வேளை 'எக்ஸ்கியுஸ் மீ ' என ஹரிஸையும் தாண்டி செவிகளில் தென் பாய்ச்சியது ஒரு குரல். கண்கள் அனிச்சையாகவே திறக்க அருகே ஒரு 'ஜீன்ஸ் அணிந்த சின்னக்கிளி' பக்கத்து இருக்கையை கேட்டுக்கொண்டு நின்றது! பஸ்ஸில் வேறு சில இருக்கைகளும் காலியாகத்தான் இருந்தன. 'கண்ணா ல‌ட்டுத் தின்ன ஆசையா' யாரோ கேட்டதைப்போல் இருந்தது. நான் சற்று விலக, பக்கத்து இருக்கை அவளை தாங்கிக்கொள்ளும் பாக்கியம் பெற்றது. என்னைப்பார்த்து இலேசாக சிரித்தாள். அவள் கன்னத்துக்குழி யாரோ ஒரு புது நடிகையை ஞாபகப்படுத்தியது. எதற்காகவோ எழும்பினாள். இறுக்கமான் டீஷேர்ட்டும், ஜீன்ஸும் அவள் வளைவு நெளிவுகளை அந்த மங்கலான வெளிச்சத்திலும் அம்பலப்படுத்தின. பார்வை அவளை விட்டு அகல மறுத்தது. கண்களை அவள் ஆக்கிரமித்துக்கொள்ள காதுகளை ஆலாப் ராஜா ஆக்கிரமித்தார் 'என்னமோ ஏதோ முட்டி முளைக்குது மனதில்....' என..!

*************

5.20, 5.25,5.30... அவள் அருகாமை தூக்கத்தை துரத்தி விட்டிருந்த‌து. 'நெருங்காதே பெண்ணே எந்தன் நெஞ்செல்லாம் நஞ்சாகும்..' திரும்பத் திரும்ப 'என்னமோ ஏதோ...'வையே மன‌ம் விரும்பியது. யார் நெருங்குகிறோம் விளங்கவில்லை, ஆனால் எங்களுக்குள் இடைவெளி குறைவது மட்டும் நன்றாக விளங்கியது. ஒரு 'ஹலோ' சொல்லலாம் என 'சுவாமி நித்தியானந்தா'வை ;-) வேண்டிக்கொண்டு மனதில் ஒத்திகைபார்க்க ஆரம்பித்த வேளை, தோளில் தென்றல் மோதியதைப்போல ஒரு உணர்வு. திரும்பியபோது.. [மக்கள்ஸ் உங்கள் மனதை திடப்படுத்திக்கொள்க...! ;-)] அவ‌ள் என் தோளில் சாய்ந்து தூங்கிகொன்டிருந்தாள். 'கண்ணா ரெண்டாவது லட்டுத்தின்ன ஆசையா..?' ஆலாப் ராஜாவே காதுக்குள் கேட்டார். 'AXE EFFECT' வேறு ஜாபகத்திற்கு வந்து தொலைத்தது. சுதாகரிப்பதற்குள்ளே நிமிடங்கள் பறந்திருந்தன. அவள் 'ஷாம்பு' வாசம் நாசியில் நுழைந்து உயிரை கபளீகரம் செய்துக்கொண்டிருந்தது. இன்ப நிமிடங்கள் இம்ஷித்துக் கொண்டிருந்தன. அவளோ மேலும் மேலும் நெருங்கினாள், நானோ மேலும் மேலும் நொறுங்கினேன். அடுத்தது என்ன..... என் கழுத்தில் அவள் இதழின் ஈரத்தை உணர ஆரம்பித்தேன். என் வறண்ட உதடுகளில் வார்த்தைப்பஞ்சம் ! எப்படியோ சுதாகரித்துக்கொண்டு 'ஹலோ..' என்றேன் அவள் காதுகளில் மெதுவாக‌...! அதற்கு அவள்....... 'வவ் , வவ் '...குரைக்கத்தொடங்கினாள்...!

**********

'சிதம்பரச்சக்கரத்தை பார்த்த பேயை' பற்றி அறிந்து வைத்திருந்தேன். இப்போது அதை முழுவதுமாக அனுபவித்தேன். அதுவும் அரைத்தூக்கத்தில்...! அதையெல்லாம் பொருட்படுத்தாது 'சிட்டி' என் கழுத்தை நக்குவதிலே தீவிரமாக இருந்தது. கழுத்தின் ஈரத்திற்கு உண்மையான காரணம் உணர்ந்தேன். 'வவ், வவ்' மீண்டும் குரைத்தது. தூக்கம் முற்றாக கலைந்தது. நேரத்தை பார்த்தேன். அதிகாலை 5 மணி! மொபைலை எடுத்துப்பார்த்தபோது அலாரம் 'Off' செய்யப்பட்டிந்தது. அடுத்து ................. வேறென்ன எழும்பி மீண்டும் 'வழமையான' ஒரு அதிகாலைப் பயணத்திற்கு அரக்கப் பறக்க ஆயத்தமானேன்.

************

முற்றும்..! (அனால் ஒன்று அதிகாலை கண்ட கனவு பலிக்குமாம். :-P)

முத்தையா முரளிதரன் என்னும் கனவான்!

2010-07-25T16:38:00.000+05:30

Yeah Murali, your time is up!

முத்தையா முரளிதரன் ‍- கடந்த சில நாட்களாக இனம், மொழி, நாடு கடந்து கிரிக்கட் ரசிகர்கள் அனைவரது உதடுகளிலும், உள்ளங்களில் நிறைந்த பெயர்! முரளி ஒரு மிகச்சிறந்த கிரிக்கட் வீரர் என்பது உள்ளங்கை நெல்லிக்கனி! ஆனால அந்த ஒரு தகுதி மட்டும் அவரை இவ்வளவு பேரின் உள்ள‌ங்களிற்கு கொண்டுசேர்த்திருக்க முடியுமா என்பது ஐயமே! உலக ரசிகர்களின் மனதில் இடம்பிடிக்க திறமைவானாக இருந்தால் மட்டும் போதாது, கனவானாகவும் இருக்கவேண்டும்.

நான் 'கன‌வான்களின் விளையாட்டு' கிரிக்கட் இரசிகனாகிய‌ (1996 உலக‌க்கோப்பையின்) பின்னர் கிட்ட‌த்தட்ட கடந்த 15 வருடங்களில் பல போட்டிகளில் பல வீரர்களை இர‌சித்திருகினறேன். ஆனால் ஒருவரை மட்டுமே தொடந்து 15 வருடமாக ரசிக்கவெண்டுமென்றால் அவர் திறமையையும் மீறி இன்னபிற தகுதிகளும் இருக்கவேண்டும் என கருதுகின்றேன்.. அவை தான் மற்ற வீரர்களிடமிருந்து முரளியை வேறுபடுத்திக் காட்டுகின்றது. அவற்றில் முக்கியமானது, அவர் சக வீரர்களிடம் நடந்துக்கோள்ளும் விதம்! எனக்குத் தெரிந்து அவர் எந்த ஒருப் போட்டியிலும் எந்த ஒரு கட்டத்திலும் முக்கியமாக ஆட்டமிழக்கச் செய்தப்பின் எதிரணி வீரர்களை சீண்டியதோ அல்லது கடுப்பேத்தியதோ கிடையாது. மாறாக ஒரு வெள்ளந்திப்புன்னகையையும், குழ்ந்தைத்துள்ளலையுமே காணமுடியும். நேற்று வந்த சிறீஷாந்துகளும், முந்தா நாள் வந்த ஹர்பஜன் சிங்குகளும் செய்யும் அல‌ப்பரைகளுக்கும், ஆர்ப்பாட்டங்களுக்கும் மத்தியில் முரளியின் குழந்தைத்துள்ளலை யார் தான் ரசிக்காமல் இருப்பார்?

ப‌ந்தில் சுழலையும் பார்க்கலாம், முகத்தில் மழ‌லையும் பார்க்கலாம்!

மைதானத்தில் மட்டுமல்ல, வெளியேயும் தன் அணி வீரர்களிடமும், சக அணிவீரரகளிடமும் நட்பு வளர்ப்பதில் அவருக்கு நிகர் அவரே தான்! இலங்கை அணியில் புதிதாக இணையும் இளம் வீரர்களை வெளிநாட்டு சுற்றுப்பயணங்களின்போது வெளியில் அழைத்துச்செல்வது அனேகமாக முரளியாகத்தானிருக்கும் எனவும், நண்பராக‌ மட்டுமல்ல ஆலோசகராக கூட‌ பல தடவைகள் அவராக முன்வந்து ஆலோசனை வழ‌ங்குவார் எனவும் தன் அணி வீரர்களிடம் மட்டுமல்ல, எதிரணி வீரர்களிடமும் அவரது நட்பு

சக வீரர்கள் பொறாமைப்படும் அள்விற்கு இருக்கும் எனவும் ச‌மீபத்தில் தொலைக்காட்சி உரையாடலொன்றில் சனத் கூறியிருந்தார். அப்படி ஒருவரின் இழப்பு இல‌ங்கை அணிக்கு மைதானத்திற்கு உள்ளே மட்டுமல்ல மைதானத்திற்கு வெளியேயும் ஈடு செய்ய முடியாதவொன்றாக இருக்கப்போகின்றது என்பது மட்டும் திண்ணம்!

கையும் பேசும், வாயும் பேசும்!

எந்தவொரு சாதனைக்கு பின்னும் ப‌ல சோதனைகளும் வேதனைகளும் இருக்கத்தான் செய்யும். முரளியும் இத‌ற்கு விதிவிலக்கல்ல.அவ்வாறான சோதனைக‌ள் முரளிக்கு ஒரு முறை அல்ல பல‌ முறை நடந்தேறியது நாம் அறிந்ததே. ப‌ந்தை எறிகின்றார் என்று 1995ஆம் ஆண்டு நடுவர் ட்ரல் ஹெயாரினாலும், தொடநது 1999 ஆம் ஆண்டு ரோஸ் எமர்சனாலும் குற்றம் சுமத்தப்பட்டார் (இதேப்போட்டியில் 303 என்ற வெற்றி இலக்கை இல‌ங்கை அடைந்தபோது வெற்றி ஓட்ட்த்தை பெற்றதும் முரளியே, அதே குழ்ந்தைத்துள்ளலோடு!).அது மட்டுமலலாது 2004ஆம் ஆண்டு அவரது துருப்புச்சீட்டு 'தூஷ்ரா' பந்தையும் கிரிக்கட் விதிகளுக்குட்பட்டது என நிரூபித்துக் காட்டவேண்டிய சூழ்நிலையும் ஏற்பட்டது.அப்போதெல்லாம் கூட ம‌ற்றவர்களைப்போல் வீணே வாய்ச்சவடால்களில் இற‌ங்காது அவர்களின் வழியிலேயே அவர்களுக்கு தனது பந்துவீச்சு விதிகளுக்குட்பட்டது தான் என நிரூபித்துக் காட்டினார். சமீபத்தில் கூட ரோஸ் எமர்சன் தன் 'திருவாய்' மலர்ந்து முரளி இந்த சாதனைகளுக்கு தகுதியானவர் அல்ல எனவும் அவரது பந்துவீச்சு முறையற்றது என்பதில் இன்னும் தான் உறுதியாக இருப்பதாகவும் கூறியிருந்தார். அதற்கு பிற‌கும் கூட முரளி அவரைப் பற்றி கூறுகையில் 'அவர மேல் தனக்கு எந்த வித‌மான வருத்தமும் இல்லையென‌வும், அவர் வெறும் கண்ணில் (Naked Eye) பார்ப்பதால் அப்படி தோன்றுவது இயல்பு, அது அவரின் கடமை எனவும் கூறியிருந்தார். இது முரளியின் பெருந்தன்மைக்கு ஒரு சோறு பதம்!

மடியில் கனமில்லை, வழியில் பயமில்லை!

'டெஸ்ட் போட்டிகளிலிருந்து ஓய்வு' என்ற முரளியின் திடீர் முடிவும் கூட காலம், நிலை அறிந்து எடுக்கப்பட்ட முடிவு என்பதில் எனக்கு துளியும் முர‌ண்பாடில்லை. இப்போதெல்லாம் பந்துவீச்சில் அதே பழைய முரளியை காணமுடிந்தாலும் களத்தடுப்பில் அந்த பழைய முரளியை காணமுடிவதில்லை. மனம் முரளியின் கட்டுப்பாட்டில் இருந்தாலும் உடல் வயதிற்கு கட்டுப்பட்டுத் தானே ஆகவேண்டும். இது புரியாமல் சங்கக்காரவே சில போட்டிகளில் களத்தடுப்பின்போது முரளியை கடிந்துக்கொள்வதை நானே பார்த்திருக்கின்றேன். (இதுவும் முரளியின் இந்த திடீர் முடிவுக்கு நிச்சயம் ஒரு உந்துதலாக அமைந்திருக்கும்). முரளியை இப்போது தலையி(தோளி)ல் தூக்கிவைத்து கொண்டாடினாலும் சில போட்டிக‌ளின் தொடர்ச்சியான சறுக்கல், சமிந்த வாஸ், சனத்தைப் போல் முரளியையும் கழட்டிவிடப் பபட்டிருக்க‌கூடிய சூழ்நிலையை உருவாக்கியிருக்கலாம் என்பதை மறுப்பதற்கில்லை. இதை முரளியே அறிவார். அதனால் முரளியின் இந்த முடிவு நிச்சயம் ஒரு நல்ல முடிவு; காலம் அறிந்து எடுக்கப்பட்ட முடிவு. ஒரு நாள் போட்டிகளுக்குக்கூட 'போட்டிகளுக்கு என்னை தெரிவு செய்யத்தேவையில்லை, நானே போட்டிகளை தெரிவு செய்துக்கொள்ளுகின்றேன்' என்ற‌ மறைமுக செய்தியோடு முரளி எடுத்திருக்கும் அந்த முடிவுக்கு ஒரு சல்யூட்! ஆனால் கடந்த‌ டெஸ்ட் தொடர்களின் வெற்றிகளில் முரளியின் பங்கும், அதை ஈடு செய்ய மென்டிஸ், சுராஜ் ரான்டிவ் போன்றோர் படவேண்டியிருக்கும் கஷ்டமும் சொல்லித் தெரிய வேண்டியதில்லை.

எனக்கு இனி ஓய்வு, உனக்கு இனி வாழ்வு!

இறுதியாக‌ 800 விக்கெட்டுகளை தொட 8 விக்கெட்டுகளே மிச்சமிருந்த நிலையில் முரளி நினைத்திருந்தால் இந்தத் தொடர் முழுதும் விளையாடி அதை உறுதிப்படுத்தியிருக்கலாம். ஆனால் முதல் போட்டியிலேயே ஓய்வு என்ற முடிவை எடுத்திருந்தார் முத்தையா முரளிதரன். ஒன்று 8 விக்கட்டுகளையும் எப்படியும் எடுத்துவிடலாம் என்ற தன்ன‌ம்பிக்கை அல்லது 800 என்ற இலக்கத்தை துச்சமென நினைத்த அந்த மனம்‍‍ ஏதொவொன்றிற்காக‌ Hats off to you Murali!

நிறம் மாறிய பந்தும், நிறம் மாறாத புன்னகையும்!

முரளி இல்லாமல் இனி டெஸ்ட் போட்டிகளின் போது மைதானங்கள், இலங்கை அணியின் 'Dressing Room' மட்டுமல்ல நமது தொலைக்காட்சி பெட்டிகளிலும் கூட அந்த வெறுமை தெரியத்தான் போகின்றது. ஆனால் ஒன்று, டெஸ்ட் போட்டிகளிலேனும் கள‌த்தடுப்பின்போது

'தலைவர்' சங்கக்கார முரளியை கடிந்துக்கொள்வதை கனத்த மனத்துடன் பார்க்கவேண்டியிருக்காது.

மாத்தியோசி-2

2010-07-19T09:32:00.001+05:30

'மாத்தியோசி-1' இல் திரைப்படங்களில் வந்த‌ சில சிலேடைகளை பற்றி எழுதியிருந்தேன். வரவேற்பும், பாராட்டுகளும் வந்து குவிந்தன. பின்னூட்டங்களை வாசித்து முடிக்கவே மூன்று நாள் முழுதாக முக்கவேண்டியிருந்தது. (மொத்தமா ரெண்டு ஓட்டு, ரெண்டு கமெண்ட்ஸ். அதுல ஒண்ணு நம்மளே போட்டுக்கிட்டது ......அஆங்க்). அதே உற்சாகத்திலேயே(....?) சூட்டோடு சூட்டாக மாத்தியோசி-2 ஐயும் எழுதி முடித்துமுடித்துவிட வேண்டுமென்று இதொ கிட்டத்தட்ட நான்கே மாதத்தில்
(அடங்கொய்யாலே...) மாத்தியோசி-2வும் ரெடி!

இந்தப்பதிவு மாத்தியோசிக்க வைக்கும் சில பழமொழிகளை ப‌ற்றியது. பழமொழிகள் - அனுபவங்களின் குழந்தை! அதுவும் ஒரே பழமொழி இருவேறு அனுபவத்தை த‌ந்தால் சொல்லவும் வேண்டுமா? அவ்வாறு அமைந்த சில பழ‌மொழிகளைப் பற்றியே இந்தப்பதிவு.

முதலாவதாக ஒன்றுக்கு மேற்பட்ட அர்த்தங்களை தருமாறு வரும் ‌ பழமொழிகளில் ஒன்று.

'ஆறிலும் சாவு, நூறிலும் சாவு'

பொதுவான விளக்கம் ஆறு வயதிலும் சாவு வரலாம், நூறு வயதிலும் சாவு வரலாம். இது எல்லோரும் அறிந்தது. இதே பழமொழி

'ஆறிலும் சாவு, நூலிலும் சாவு'

என சற்றே மருவி ஒலிக்கும்போது உணர்த்தும் அர்த்தம் வேறு (இதில் வரும் ஆறு‍ - ‍அருவி).

ஆனால் இவற்றை விட நான் அறிந்த இன்னொரு விளக்கம் மிக வித்தியாசமானது, சுவாரஷ்யமானதும் கூட‌‌. அது குருஷேத்திரப்போரில் கர்ணனின் நிலையோடு இப்பழமொழியை தொடர்புபடுத்தி பின்வருமாறு அமைகின்றது. கர்ணன் குருஷேத்திரப்போரில் கௌரவர்கள் (துரியோதணன் கோஷ்டி) 100 பேரோடு இருந்தாலும் அவனை பஞ்சப்பாண்டவர்கள் போட்டுத்தாக்குவது உறுதி (அப்பயெல்லாம் நல்லவங்கதான் ஜெயிப்பாங்கலாம்...ம்ம்ம்). அல்லது பஞ்சப்பாண்டவர்கள் அணியில் அறுவரோடு (கண்ணனோடு சேர்த்து) சேர்ந்தாலும் செஞ்சோற்றுக்கடன் மறந்தமைக்காக‌ அவனது மனசாட்சியே அவனை கொஞ்சம், கொஞ்சமாக கொன்றுவிடும். ஆக‌ 'ஆறிலும் சாவு, நூறிலும் சாவு'! (கொஞ்சம் இடித்தாலும்) மிக சுவாரஸ்யமான விளக்கம்!

அடுத்த பழமொழி அத்தனை பிரபலமானது அல்ல என நினைக்கின்றேன். அது

'சோழியன் குடுமி சும்மா ஆடாது'

என வரும். இது காரணமில்லாமல் காரியமில்லை என்ற அர்த்தத்தை தருகின்றது ('எலி ஏன் அம்மணமா ஓடுது?' என்ற உலகமகா கேள்வியின் புழக்கத்தால் இந்த பழமொழியின் புழக்கம் அவ்வளவாக இல்லை என நினைக்கிறேன்). ஆனால் இதன் உண்மையான வடிவம் இதுவல்ல எனவும், இது காலப்போக்கில் மருவி வந்த வடிவம் எனவும் எங்கள் ஆசிரியர் ஒருவர் கூறியதாக ஞாபகம். உண்மையான வடிவம்

'சோழியன் குடுமி சும்மாடு ஆகாது'!.

இதில் வரும் சும்மாடு‍ - சுமை தூக்கும்போது அழுத்தாமலிருக்க தலைக்கு வைப்பது.(அதாங்க.. 'சோறு கொண்டு போறப்புள்ள அந்த சும்மாடு இறக்கு'ன்னு 'என் ஆசை மச்சான்'ல நம்ம கேப்டன் பாடுவாரே..அதெ சும்மாடுதான்!)

இதைப்போல் இன்னும் பல இருக்கின்றன. அவை தொடர்ந்து வரும். (அடுத்தத‌யும் அரும்பாடுப்பட்டாவது நாலு மாசத்தில எழுதி முடிச்சிடணும் ;))

'மாத்தியோசி-1' இல் திரைப்படப் பெயர்களிலிருக்கும் சில சிலேடைகளை பற்றி குறிப்பிட்டிருந்தென். ஆனால் அவற்றையெல்லாம் அள்ளிச் சாப்பிடும் அள‌விற்கு தமிழ்த்திரைப்பட பெயரொன்றில் சிலேடை ஒன்று உள்ளது. அது

'முள்ளும் மலரும்'!

'முள் + மலர்' என்பது ஒரு அர்த்தம். ஆனால் 'மலரும்' என்பதை செயலாக பார்க்கும்போது 'முள்ளும் கூட மலரும்' என்ற அர்த்தத்தில் ஒலிக்கின்றது. தலைப்பிலேயே ஒரு குட்டிக்கவிதை. இது அதுவாக அமைந்ததா அல்லது அறிந்தே வைக்கப்பட்டதா என்பது இயக்குனர் மகேந்திரனுக்கே வெளிச்சம்!

இறுதியாக....
எப்புடியெல்லாம் மாத்தி யோசிக்கிறாய்ங்க, அவ்வ்..!

'எப்பொருள் யார்யார் வாய்க் கேட்பினும் அப்பொருள்
மெய்ப்பொருள் காண்ப தறிவு.' .

கா(தல்) முதல் க(ண்ணீர்) வரை...!

2010-05-22T10:40:00.004+05:30

உன் புன்னகை, உன் சிணுங்கல், உன் கோபம், உன் அமைதி, உன் விருப்பம், உன் வெறுப்பு, உன் காதோரத்து பரு, உன் உதட்டோரத்து மச்சம்........ அத்தனையும் எனக்கு அத்துப்படி. ஆனால் இன்னும் நம்பிக்கையில்லை என‌க்கு - என் முழுப்பெயர் தெரியும் உனக்கென்று!

♥♥♥♥♥♥♥♥♥♥♥♥♥♥

உன்னை நான் பார்க்கும்பொழுதுகளில் எல்லாம் உன் மேலாடையை சரி செய்துக்கொள்ளுகின்றாய். அப்படி பார்த்தால் நீ முதலில் ஆடை அணிய வேண்டியது உன் கண்களுக்குத்தான்!

♥♥♥♥♥♥♥♥♥♥♥♥♥♥

உன் பெயர் தாங்கிய கடதாசித் துண்டுகள் கூட என் சேமிப்பில் பத்திரமாக. அவற்றின் காதுகளுக்கு கேட்க வாய்ப்பில்லை‍ - உன் வீட்டு குப்பைத்தொட்டியில் கிழிந்து கிடக்கும் என் காதல் கடிதங்களின் கத‌றல்!

♥♥♥♥♥♥♥♥♥♥♥♥♥♥

நண்பர்கள் கேட்கின்றார்கள், காதலர் தினத்தன்று காதலி உன்னிடமிருந்து பெற்ற பரிசை. எப்படி காட்டிவிடுவது ‍- சிந்திவிட்ட கண்ணீர்த்துளிகளை!

♥♥♥♥♥♥♥♥♥♥♥♥♥♥

ஏமாறத்தான் முடிகின்றது, ஏமாற்றுகின்றாய் நீ என்று தெரிந்திருந்தும்!
இறுதியாக‌ ஒன்றை மட்டும் உணர்த்திவிடு,
புரிந்துக்கொள்ள மறுக்கின்றாயா, இல்லை புரிந்துக்கொண்டு மறைக்கின்றாயா!

வேணாம், இந்த IPL வேணாம்..!

2010-04-07T11:46:00.002+05:30

'பத்து மணிக்கு படுத்து, ஆறு மணிக்கு எழும்பி' நல்லாத்தானேய்யா போய்க்கிட்டுருந்துச்சு! இப்ப பத்து பதினொன்னாகி ,பன்னிரண்டாகி.....கருமம் கனவுலயும் அனுஷ்காவுக்கும், த்ரிஷாவுக்கும் பதிலா இந்த ஃபோரும் சிக்ஸருமா வந்து கடுப்பேத்த‌‌....
வேணாம், தூக்கத்துக்கு ஆப்படிச்ச‌ இந்த IPL வேணாம்!

கோபி நாத்துக்கும், அல்கா அஜித்துகளுக்கும் ரிசர்வ் பண்ணி வச்சிருந்த அந்த 'நைன்' டூ 'லெவன' கொண்டுப்போயி (மொங்கூசு) பெட்டுலயும் , சியர் லீடர்ஸ் இடுப்புலயும் அடகு வெச்சாச்சு. அம்போன்னு உக்காந்திருக்கிற அம்மா 'இவன் செனல்ல மாத்தமாட்டான்'னு எழும்பி போறப்ப‌ அந்த (மொங்கூசு) பெட்டயே புடுங்கி தலையில அடிச்சுக்கத் தோணும்.
அதனால‌....
வேணாம், அம்மாக்களுக்கு புடிக்காத இந்த IPL வேணாம்!

ஆறுமணிக்கு 'மெட்ச்சா பாக்குற மெட்ச்சு, எழும்படா மோனே'ன்னு அலறுற அலாரத்தோட‌ சேத்து நேத்து வெளையாடின ரெண்டு டீமையும் அசிங்க, அசிங்கமா திட்டிட்டு (தேங்ஸ் டூ ஹர்பஜன் சிங், சிறீசாந்த் ) கண்ண‌ லேசா மூடுனா ஆபிஸ் டிரான்ஸ்போர்ட்ட‌ விட்டுட்டு ஆட்டோக்காரனுக்கு அழுகுற‌ 100 ரூவா நோட்டு பல்லக்காட்டி இழிக்க.....
வேணாம், 'ALARM CLOCK' அ சுக்கு நூறாக்குன இந்த IPL வேணாம்!

அடிச்சு புடிச்சு ஆபிஸ் வந்து சேந்து 'BOSS'க்கு 'குட் மோர்னிங்' வச்சா அடிவாங்கி அழுத சிறீசாந்த் கண‌க்கா செவந்துக்கெடந்த கண்ணப்பாத்து அவரு கேட்டது 'நைட்டு பார்ட்டியா?'ன்னு. அதனால..
வேணாம், எங்க 'BOSS' பாக்காத‌ இந்த IPL வேணாம்!

அதே எரிச்சலோட‌ 'FACEBOOK' அ தெற‌ந்தா அவனவன் ரவி சாஸ்திரி கணக்கா நடந்த மெட்ச்ச ப‌த்தி ஆராச்சி ப‌ண்ணி வச்சிருக்க அதயும் மிச்சம் வைக்காம இந்த எழவெடுத்த‌ கண்ணு துருவி, துருவி ஆராய‌.....
வேணாம், இந்த 'FACEBOOK IPL' வேணாம்!

கடைசியா எட்டுக்கே இவ்வளவு எழவாயிருக்கே, இன்னும் பத்து வந்துச்சுன்னா....
வேணாம், அடுத்த IPLலும் வேணாம்!

மாத்தி யோசி! -1

2010-03-19T11:03:00.004+05:30

'யாமறிந்த மொழிகளிலே தமிழ்மொழி போல்

இனிதாவது எங்கும் காணோம்'

மகாகவி பாரதி பாடியது. எனக்கும் அவ்வாறே! (இவனுக்கு வேற எத்தன மொழி தெரிஞ்சிருக்கப்போகுதுனு நீங்க கேக்குறது விளங்குது . அரசியல் வாழ்க்கைல இதெல்லாம் சகஜமப்பா..கண்டுக்கப்படாது! )

அதிலும் தமிழிலக்கணத்தில் 'சிலேடை' எனக்கு மிகவும் பிடித்தவொன்று. சுருக்கமாக சொல்வதென்றால் ஒரே சொல், பல பொருள். ஆங்கிலத்தில் 'PUN' (Paranomasia) என்பார்கள். இந்த சிலேடை, சினிமாப்பாடல்களில் உரிய‌ இடத்தில் வரும்போது....குழல், யாழ், ஏன் மழலை மொழிக் கூட‌ தோற்றுப் போய்விடும். அவ்வளவு இனிமையாக இருக்கும். அதிலும் கவிப்பேரரசு வைரமுத்து, கவியரசு கண்ணதாசன், கவி மார்க்கண்டேயர் வாலி போன்றோர் சிலேடைகளை பாடல்களில் புகுத்தும் விதம்..ஆஹா...தமிழ் தமிழ் தான், கவிஞன் கவிஞன் தான்!

முதலில் கண்ணதாசன். இவர் 'வீர அபிமன்யு' என்ற திரைப்படத்தில் 'பார்த்தேன் சிரித்தேன்' என்ற காதல் பாடலில் ஒரு இடத்தில்

'அந்த மலைத்தேன் இதுவென மலைத்தேன்'

என சிலேடையில் சிலிர்க்க வைத்திருப்பார். இதில் ஒன்று மலை+தேன் (மலைப்பிரதேசத்திலிருந்து எடுக்கப்பட்ட சுவையான தேன்) மற்றையது ஆச்சர்யத்தில் மலைத்துப்போவது. மிகவும் எளிதான சிலேடை. இது மட்டுமில்லாது இந்தப்பாடல் முழுவதுமே கண்ணதாசன் ஒரு த‌மிழ் ஆட்சியே நடத்தியிருப்பார். அதுப்பற்றி மட்டுமே ஒரு பதிவு எழுதலாம்.

அடுத்து வாலி, மூன்று தலைமுறையாக சினிமாப்பாடல்களில் தனது ஆட்சியை நடத்திக்கொண்டிருப்பவர். இவர் ச‌மீபத்தில் 'அழகிய தமிழ் மகன்' திரைப்படத்தின் 'எல்லாப் புகழும்..' என்ற பாடலில்

'எந்த வேர்வைக்கும் வெற்றிகள் வேர்வைக்குமே'

என சற்று வித்தியாசமாக வார்த்தையையும் தாண்டி, ஒரு வசனத்தையே (வேர் + வைக்கும்) சிலேடையாக‌ புகுத்தி அசத்தியிருப்பார். ஆனால் இந்தப்படம் விஜயின் வெற்றிக்கு வேர் வைக்காமல் போனது வேற கதை.

இவை என்னதான் சிறப்பாக‌ இருந்தாலும் எனக்கென்னவோ சிலேடை என்ற‌வுடனே ஞாபகத்திற்கு வருவது வைரமுத்துவின் 'செவ்வாய்' தான். அமர்க்கள‌ம் திரைப்படத்தின் 'மேகங்கள் என்னைத்தொட்டு..' என்ற பாடலில் வரும்

'செவ்வாயில் ஜீவராசி உண்டா என்றே அடி தின‌ந்தோறும் விஞ்ஞானம் தேடல் கொள்ளும், உன் செவ்வாயில் உள்ளதடி எனது ஜீவன், இதை அறியாமல் விஞ்ஞானம் எதனை வெல்லும்?'

என்ற வரிகளில் சிலேடையின் சிகரம் தொட்டிருப்பார். இதில் முதலாவது செவ்வாய்‍ செவ்வாய்க்கிரகம், அடுத்தது செவ் வாய் (சிவந்த வாய்). அந்த வாய் உதிரப்போகும் வார்த்தையில் தான் அவன் உயிர் உள்ளது என்ற அர்த்தத்தில் வரும் இந்த சிலேடை வைரமுத்துவின் தமிழ் ஆளுமைக்கு ஒரு சோறு பதம்.

இந்த சிலேடைகள் தான் நான் மிகவும் ரசித்தவை. இவை தவிரவும் நிறைய இருக்கின்றன, இருக்கலாம். சமீபத்தில் கூட‌ 'விண்ணைத்தாண்டி வருவாயா' திரைப்படத்தில் கவிதாயினி தாமரை

'ஓமணப்பெண்ணே, ஓ மணப்பெண்ணே'

என சிலேடையை இலேசாக தொட்டிருப்பார். முதல் ஓமணப்பெண்‍ ‍- மலையாள‌ம், அடுத்தது 'ஓ + மணப்பெண்'(கல்யாணப்பெண்).
('ஓ மனப்பெண்ணே' என்றும் வருகிறது)

பாடல்கள் மட்டுமல்ல, திரைப்பட பெயர்களில் கூட‌ சிலேடைகள் இருக்கின்றன‌. உதாரணமாக‌

'திருடா திருடா'.

சேர்த்தெழுதினால் 'திருடாதிருடா' அதாவது 'திருடாது + இருடா'.
அதேப்போல் 'திருடா திருடி'‍‍ ‍- ‍‍திருடாது + இருடி.

இதுப்போல் இன்னமும் நிறையவே இருக்கின்றன‍‍‍- மாத்தி யோசிக்க!

அவை தொடர்ந்து வரும்.....

அதுவரை நீங்களும் உங்களுக்கு தெரிந்த சிலேடைகளை மனக்கண்களில் ஓட்டிடுங்கள். அப்படியே இங்கே எனக்கும் ஒரு ஓட்டிடுங்கள்‍.(ஓட்டு+இடுங்கள்)
(ஷ்ஷப்பா...இந்த ஒரு ஓட்ட‌க்கேக்க‌ எப்படியெல்லாம் யோசிக்கவேண்டியிருக்கு....அவ்...வூ)

அவளுக்கும் அமுதென்று பேர்!

2010-03-08T13:21:00.000+05:30

பூங்காவின் மடியில் பூவை அவள்.
விடிந்திருந்தது, ஆம் அவள் விழித்திறந்திருந்தாள்.
பூக்களின் மேல் பனித்துளிகள் தானே வழக்கம்; பனித்துளிகள் மேல் பூ அவள், புதுமை தான்!
கன்னியவள் கரங்களின் அரவணைப்பில் புதுக்கவிதையொன்று.
ஆஹா, புதிர்க்கவிதை கைகளில் புதுக்கவிதை!
அவள் விரல்கள் கவிதைத்தாளை வருட, விழிகள் கவிதையை வருடத்தொடங்கின..
அவள் கவிதை வாசிக்க...அல்ல, வடிக்கத்தொடங்கியிருந்தாள்.
அவள் விழிகள் விரிந்தன‌, கூடவே கவிதையின் விழிகளும்!
கன்னியவள் இமை உய‌ர, கவிதைத் தலை குனிந்தது.
அவள் இதழ‌சைவின் 'ஹைக்கூ'வில் புதுக்கவிதை புழுங்கல் கவிதையானது.
எதுகை நயமும், மோனை நயமும் அவளது விழி அபிநயத்தில் சிக்கித்தவிக்க, கவிதையின் எண்ணம் அவள் கன்னத்து வண்ணத்தில் கரைந்துப் போயிற்று.
அவளது உள்ள‌ங்கை உவமைகளை ஊமையாக்கியது.
சொல்லும், பொருளும் அவள் விரல்களின் ஸ்பரிஷத்தில் சிலிர்த்துப் போயிருக்க,
கவிதையின் தலைப்பு ஓடிச்சென்று அவள் நெற்றிப்பொட்டின் பின்னால் ஒளிந்துக்கொண்டது.
சரிந்து விழுந்த அவளது முடிக்கீற்றில் கவிதையின் கரு தற்கொலை செய்து கொள்ள,
முதலிடக் கவிதை அவள் முன்னழகில் மூர்ச்சையானது.
வெட்கித்தலை குனிந்து, அவள் விரல் விட்டு விடைப் பெற்ற கவிதை சொல்லாமல் சொல்லிற்று,
அவள் விழி பார்த்து
'கவி மொழியால் மட்டுமல்ல, (உன்) விழியாலும் எழுதலாமென்று'!
பூங்காவிற்கு புரியவில்லை,
'கவிதை வாசித்தது அவளா, இல்லை
கவிதை வாசித்தது அவளையா' என்று!

யாவும் நிஜம் ‍- காதலர்களுக்கு..!

2010-02-12T10:53:00.005+05:30

அவளும் நானும்...!

முதல் பார்வை, முதல் வார்த்தை, முதல் ஸ்பரிஷம், முதல் கோபம்.........
அந்த முதல் தருணங்களின் தவிப்புகளையும், தத்தளிப்புகளையும் கோர்த்தெடுத்தால் 'பேரரசு' கூட காதல் படமொன்று எடுத்துவிடலாம்!

இன்றோ நொடிக்கு நொடி காதல் தான்.
நெருங்கி நெருங்கி நொறுங்கிவிடுகின்றோம்.
இரகசியங்கள் எங்கள் நெருக்கத்தில் சிக்கி செத்துபோகின்றன.
'MEMORY CHIP'களை 'MESSAGE'களே நிரப்பிகின்றன.
ஊடலின் பொய்க்கோபங்கள் கூடலின் கண்ணீரில் சாயம்போகின்றன.
தோல்வித்துயர் அவள் மடியின் இதத்தில் தொலைந்துப்போகும்; வெற்றிக்களிப்போ அவள் உதட்டுச்சூட்டில் இரட்டிப்பாகும்!
விடுமுறை தினங்களில் தான் எங்களுக்கு முழு நாள் வேலை-காதல் அலுவலகத்தில்!
விடிய விடிய தேடுகிறோம் 'சங்கீத ஸ்வரங்கள் ஏழே கணக்கா இன்னும் இருக்கா....' என்று!
எங்கள் அரட்டையில் வைகைப்புயலும் சரி, வெள்ளைமாளிகையும் சரி, எதுவும் தப்பிவிட முடியாது!
A.R ரஹ்மானுக்கெல்லாம் நாங்கள் பல தடவை ஆஸ்கார் கொடுத்தாயிற்று.
எங்கள் கனவுகளின் 'டூயட்'டுகளை வைரமுத்துதான் எழுதி த‌ருகின்றார்.
அவளும் என்னைப் போலவே 'அஞ்சல....'வையும் ரசித்திடுவாள், 'அனல் மேலே பனித்துளி..'யையும் ரசித்திடுவாள்.
அவளது தந்தை எப்போதோ எனக்கு 'UNCLE' ஆகிவிட்டார்; எனது வீட்டுச்சமையலிலும் அடிக்கடி அவள் கைப்பக்குவம்!
சில்மிஷங்கள் சில ....ஓ... நேரமாகிவிட்டது. காத்துக்கிடப்பாள் அவள் -காதல் அலுவலகத்தில்...!

யாவும் கற்பனை- (என்னைப்போல்) கடலை மட்டும் போடுபவர்களுக்கு; யாவும் நிஜம்‍- காதலர்களுக்கு...!
ஆனாலும் கற்பனையில் கூட நன்றாகத்தான் இ(னி)ருக்கின்றது-காதல்..!

ஆயிரத்தில் ஒருவன்‍ - புரிந்தவையும், புரியாதவையும்.

2010-02-01T15:49:00.006+05:30

கொஞ்சம்(...?) தாமதான பதிவு. அனேகமாக ஆயிரத்தில் ஒருவனைப்பற்றி கடைசியாக வரும் பதிவாகக்கூட இருக்கலாம். ஏற்கனவே பல விமர்சகர்களும் தொலைக்காட்சி சேனல்களும் படத்தை அக்கு வேர், ஆணி வேராக பிரித்து மேய்ந்து விட்டார்கள். அவர்கள் அளவிற்கு நான் 'சிந்தனை வாதி'யாக இல்லாவிட்டாலும், ஒரு சராசரி தமிழ்த்திரைப்பட ரசிகன் என்றவகையில் இத்திரைப்படத்தில் எனக்குப் புரிந்தவையும், புரியாதவையும் இதோ.....

புரிந்தவை

தமிழ் சினிமாவிற்கு இப்படி ஒரு திரைப்படம் 'புதுசு கண்ணாப் புதுசு'!.

தமிழிலும் இனி Gladiator, Pirates of the Carribean, National Treasure போன்ற படங்களுக்கு ஒப்பான படங்கள் வருமாக இருந்தால் அவ‌ற்றிற்கு இப்படம் ஒரு தொடக்கம்.

'புதுப்பேட்டை' தோல்வியால் காதல் கதைக்குத்தான் லாயக்கு என முத்திரைக்குத்தப்பட்ட செல்வராகவன், அந்தப்பெயரை உடைத்தெறிந்துள்ளார்.

படத்தில் சில இடங்களில் தவிர்த்திருக்கக்கூடிய லாஜிக் ஓட்டைகள்.

முக்கியமாக பிற்பாதியில் ஆண்ட்ரியா, பிரதாப்பொத்தனின் பாத்திரப்படைப்பு மற்றும் விமானத்தில் வந்திறங்கும் வீரர்கள், ஆயுதங்கள்.

ரீமாசென் என்ற ஒரு சிறந்த நடிகையை இவ்வளவு காலமும் தமிழ் சினிமா வீணடித்துவிட்டது.

படத்தில் கார்த்தி, பார்த்திபன் இருவரும் கதாபாத்திரங்களாகவே மாறி உள்ளார்ந்தமான நடிப்பை வெளிப்படித்தியிருந்தாலும் அவர்களையும் மீறி ரீமாசென் ஒரு கலக்கு கலக்கியிருக்கின்றார் என்றே சொல்லவேண்டும். ததும்பும் இளமையில் (அம்மணிக்கு '30'தாம், பக்கத்தில் ஒருவர் சொன்னார். அப்படியா என‌ விசாரித்தால், வயசாம்...! ) அவர் போடும் ஆட்டமாகட்டும், சண்டையாகட்டும், முற்பாதியில் கார்த்தி, பிற்பாதியில் பார்த்தி என இருவருடனும் மல்லுக்கு நிற்பதாகட்டும் அம்மணி அசத்தியுள்ளார். அதிலும் பிற்பாதியில் பார்த்திபனுடனான காட்சிகளில் ஏளனம் கலந்த கோபம் , த‌ந்திரம் கலந்த தாபம் என பல பரிமாணங்கள். இவ்வளவு காலமும் இப்படி ஒரு ரீமாசென்னை நான் பார்த்ததில்லை. Hats off to Reema and Thanks to Selvaragavan.

சோழ மன்னனின் கதாப்பாத்திரத்தில் முன்பு பார்த்திபனுக்கு பதிலாக தனுஷ் நடிப்பதாக இருந்ததாம். நல்ல வேளை, யார் செய்த புண்ணியமோ அப்படி எதுவும் நடக்கவில்லை.

இசை, ஒளிப்பதிவு, பாடல் வரிகள் உட்பட‌ விருது கொடுக்கவேண்டிய அம்சங்கள் படத்தில் ஏராளம்.

'உளியின் ஓசை' போன்ற 'தரமான' படங்கள் எதுவும் இந்த வருடம் வெளிவராம‌லிருந்தால் கிடைத்தாலும் கிடைக்கலாம். முக்கியமாக இசை- முற்பாதிக்கும், பிற்பாதிக்கும் காட்டப்பட்டிருக்கும் அந்த வித்தியாசத்திற்காகவே.

பிற்பாதிக்கு (நம்ம)தமிழ்ல்ல உபதலைப்பு போட்டிருக்கலாம்.

அட சீரியஸாத்தாங்க..! பிற்பாதியில் பல சம்பாஷணைகளின் சாராம்சம் விளங்கினாலும் பல சொற்களின் அர்த்தம் என் தமிழ்ப்புலமைக்கு(......?) எட்டவேயில்லை. ஆனாலும் அந்த தமிழ்ச்செறிவும், உச்சரிப்புகளும் உள்ளுக்குள் ஒரு இன‌ம்புரியாத சிலிர்ப்பை ஏற்படுத்துவது அவற்றின் வெற்றி.

புரியாதவை.

நான் பார்த்த படம், முழுதான படமா அல்லது நீளம் காரணமாக சில காட்சிகள் வெட்டுப்பட்ட படமா?

பலர் விமர்சித்திருந்த ரீமாசென் சம்பந்தப்பட்ட‌ காட்சிகள் இருக்கவில்லை, ஆனால் 'நெல்லாடிய நிலமெங்கே..' பாடல் இருந்தது (நீளம் காரணமாக இந்தப்பாடல் தூக்கப்பட்டிருந்ததாக‌ அறிந்தேன்).

பிற்பாதியின் சம்பாஷணைகளில் இடம்பெறும் பல 'தமிழ்'ச்சொற்கள்.

இந்த சொற்களைத் தவிர, பிற்பாதி முழுதுமே புரியவேயில்லை என்று கூறுபவர்களுக்கு அப்படி என்ன புரியவில்லை என்பது.

ஹிட்டான பல சராசரிப்படங்ளின் லாஜிக் மீறல்களை சல்லடைக்கண்களில் பார்த்துவிட்டு 'ஆஹா..ஓஹோ' என்றுவிட்டு, இப்படியான ஒரு தமிழ்ப்படத்தின் லாஜிக் மீறல்களை அதெ கண்களில் விள‌க்கெண்ணெய் விட்டுக்கொண்டு பார்ப்பதோடு அதையே தூக்கிப்பிடித்துக்கொண்டு விமர்சிப்போரின் நோக்கம்.

Gladiator, Pirates of the Caribbean, National Treasure போன்ற படங்கள் ஹாலிவூட்டில் வரும்போது இப்படியான படங்கள் தமிழிலும் வராதா? என வெளிப்படையாக‌வே ஏங்கிவிட்டு , அப்படியான முயற்சிகளுக்கு வித்திடும் இந்த மாதிரியான ஒரு படத்தின் நிறைகளை விட்டுவிட்டு, நானும் ஒரு குறைக்கண்டு பிடித்துவிட்டேன் என மார்தட்டிக்கொள்ளும் சில விமர்சகர்களின் அந்த அதிமேதாவித்தனத்தின் நோக்கம்.

(ஊடக தர்மத்துடன் தொழிற்பட வேண்டிய‌) தொலைக்காட்சி சேனல்களில் சில‌, இந்த படத்தை பாடாய்ப்படுத்துவதன் பின்னணி.

சமீபத்தில் ஒரு சேனலின் தரவரிசையில் ஆயிரத்தில் ஒருவன்‍‍ நான்காவதாம். முதலாவது‍‍ ஆதவனாம் (நூறு நாட்களை கடந்து ஓடிக்கொண்டிருப்பாதாலாம்). படத்தின் பாடல்களுக்கும் இதே நிலைமை. கொடுமை என்னவென்றால் கந்தக்கோட்டை படப்பாடல்கள் கூட முந்திக்கொண்டு நிற்பதுதான். அது சரி, காக்கைக்கே தன் குஞ்சு பொன் குஞ்சாகும்போது கலைஞருக்கு....?

இதையும் சேத்துக்குங்கோ.....

'ஆயிரத்தில் ஒருவன்‍ பகுதி II' கதை ரெடியாக இருக்கிறதாம். கட்டாயம் அதுவும் வெளிவருமாம். (சில அறிவு ஜீவிகளின் ஒருதலைப்பட்சமான‌ விமர்சனங்களால் இந்த முயற்சியை செல்வராகவன் கைவிட்டு விடாமல் இருந்தால் சரி.)

சமீபத்தில் விஜய் டீ.வியில் ஆயிரத்தில் ஒருவன் அலசல் ஒன்று இடம்பெற்றது. சுவாரஷ்யமான அந்த உரையாடலில் செல்வராகவன், கார்த்தி, பார்த்திபன், 'நீயா, நானா' கோபி நாத் மற்றும் ரசிகர்கள் கலந்துக்கொண்டனர். இதில் படத்தின் குறை, நிறைகள் பற்றி அலசப்பட்டுக்கொண்டிருந்தபோது கம்பியூட்டர் கிராபிக்ஸ் பற்றிய கதை வந்தது. செல்வராகவன், 'கார்த்தி உண்மையில் கையில் பிடித்தது பாம்ப‌ல்ல, கட்டையைத்தான்' எனறவுடன் கார்த்தி முகத்தில் ஒரு வெட்கம் கலந்த ஏமாற்றம். அவ‌ரும் உடனே தான் பாம்பை பிடிப்பதற்கு தயாராகத்தான் இருந்ததாகவும், செல்வா தான் வேணாமென்று கூறியதாகவும் ரொம்பவும் உணர்ச்சிவசப்பட்டுக் கூற அது வரை அமைதியாக இருந்த பார்த்திபன் ஒரு நச் கமென்ட் அடித்தார்

' கார்த்தி இரண்டு பாம்பை பிடித்த‌து உண்மைதான். ஒன்று ரீமாசென், மற்றது ஆண்ட்ரியா'.

இது தான் பார்த்திபன் குசும்பு.

இதோ அந்த நிகழ்ச்சி....

பாட்டு செம‌ சுவீட்டு - மெல்லினமே, மெல்லினமே...

2010-01-21T14:59:00.003+05:30

என்னதான் குத்துப்பாடல்களும் தத்துவப்பாடல்களும் பட்டி, தொட்டி எங்கும் பட்டையை கிளப்பினாலும் மெல்லிய காதல் பாடல்கள் தான் நம் மனதில் ஏறி அமர்ந்துக் கொள்ளுகின்றன . அதிலும் கவிப்பேரரசு வைரமுத்து எழுதிய பல மெல்லிய காதல் பாடல்களை கேட்கும்போதே நான் 'என் வயிற்றுக்கும், தொண்டைக்கும் உருவமில்லாத அந்த உருண்டை உருள' உணர்ந்திருக்கின்றேன் ( 'யூத்'தாக்கும் ஹி..ஹி.. ).

அப்படியான பாடல்களில் ஒன்றுதான் ஷாஜகான் திரைப்படத்தில் இடம்பெற்ற 'மெல்லினமே, மெல்லினமே....' என்ற பாடல். ஒருதலைக்காதலின் சுகம், சோகம் இரண்டையும் இவ்வளவு அழகாக வெளிப்படுத்திய பாடல்கள் மிகக்குறைவு. என்னதான் இந்தப்பாடல் சோகப்பாடல்களின் வரிசையில் வராவிட்டாலும், பாடலில் அங்கங்கே இழையோடும் சோகத்தில் கவிஞர் வாழ்ந்திருக்கின்றார்.

'மெல்லினமே மெல்லினமே நெஞ்சில்
மெல்லிய காதல் பூக்கும்...'

மெல்லினமே என்று தமிழையும், மென்மையையும் கலந்துக்கட்டி காதலியை அழைக்கும் அந்த முதல் வரி, 'வைரமுத்து டச்'!

'என் காதல் ஒன்றே மிக உயர்ந்ததடி...'
காக்கைக்கே தன் குஞ்சு பொன் குஞ்சாகும்போது, காதலனுக்கு? அடுத்த வரியிலேயே அந்த உயரத்தை அளந்தும் கொடுக்கின்றார்.
'அதை வானம் அண்ணார்ந்து பார்க்கும்'
பூக்கும், பார்க்கும் - பொருளில் மட்டுமில்லை, வார்த்தைகளிலும் விளையாடுகிறார் கவிஞர்.

'நான் தூரத் தெரியும் வானம்
நீ துப்பட்டாவில் இழுத்தாய்
என் இருபத்தைந்து வயதை
ஒரு நொடிக்குள் எப்படி அடைத்தாய்...'
ஏக்கமா, வியப்பா? காதலில் விழுந்த அந்த நொடியில் புதிதாய் பிறக்கின்றான், இருபத்தைந்து வயதை இழக்கின்றான்.
இழுத்தாய், அடைத்தாய்-அந்த வார்த்தை ஜாலம் தொடர்கிறது.

'வீசிப்போன புயலில் என் வேர்கள் சாய வில்லை
ஒரு பட்டாம் பூச்சி மோத அது பட்டென்று சாய்ந்ததடி'
புயலிலும் சாயாத வேர்கள், பட்டாம் பூச்சியால் சாய்ந்ததாக தன் ஏக்கத்தையும், வியப்பையும் தொடர்கிறான் காதலன். ஏன் வேர்? வேரில்லாமல் வேறில்லையே...வேரையே சாய்த்துவிட்டாள். இனி என்ன செய்வது!

'எந்தன் காதல் சொல்ல என் இதயம் கையில் வைத்தேன்
நீ தாண்டிப்போன போது அது தரையில் விழுந்ததடி
மண்ணிலே செம்மண்ணிலே என் இதயம் துள்ளுதடி
ஒவ்வொரு துடிப்பிலும் உன் பெயர் சொல்லுதடி'
ஒவ்வொரு காதலனுக்கும் காதலை சொல்வதில் உள்ள தயக்கத்தையும் இயலாமையயும் உணர்த்தும் வரிகள்.

'கனவுப் பூவே வருக உன் கையால் இதயம் தொடுக.
எந்தன் இதயம் கொண்டு நீ உந்தன் இதயம் தருக'
கனவுப் பூவே....உண்மை தான். ஒருதலை காதலனுக்கு அவன் காதலி 'கனவுப்பூ'தானே, நேரில் என்ன செய்ய முடியும்?
காதலை சொல்ல அவனால் முடியவில்லை. அவளாக வரவேண்டுமாம், இதயத்தை பரிமாறிக்கொள்ள!

'மண்ணைச்சேரும் முன்னே அடைமழைக்கு லட்சியம் இல்லை
மண்ணைச் சேர்ந்த பின்னே அதன் சேவை தொடங்குமடி
உன்னைக் காணும் முன்னே என் உலகம் தொடங்கவில்லை
உன்னைக் கண்ட பின்னே என் உலகம் இயங்குதடி..'
ஆஹா, இப்படித்தானே இருக்க வேண்டும் உவமை. எவ்வளவு எளிமையான வரிகள். குழ‌ந்தைக்கும் புரியும்.
'முன்னே', 'பின்னே' என வார்த்தைக் கோர்வைகள் காதில் தேனாக பாய்கின்றன.

'வானத்தில் ஏறியே மின்னல் பிடிக்கிறவன்
பூக்களைப் பறிக்கவும் கைகள் நடுங்குகிறேன்'
காதல் ஏற்படுத்தும் மாற்றத்தையும், மென்மையையும் இதை விடவும் அழகாக கூறி விட முடியுமா, இரண்டே வரிகளில்?

கடைசி வரிகள் தான் இந்தப் பாடலின் 'MASTERPIECE'.
'பகவான் பேசுவதில்லை அட பக்தியும் குறைவதுமில்லை
காதலி பேசவுமில்லை என் காதல் குறைவதும் இல்லை '
உவமையின் உச்சம். நான் முன்பே கூறியது போல் இந்த வரிகளின் பின்னே இழையோடும் சோகம், நம் மனதிலும் குடிகொள்கின்றது. இதுவே இந்த வரிகளின் வெற்றி.

பாடல் வரிகளின் தொடர்ச்சித்தன்மையில் ஒரு குட்டிக்கதையையே கவிஞர் சொல்லிமுடித்திருப்பதை உணரலாம், முடிவு உட்பட‌ (படக்கதையும் கிட்டத்தட்ட அதுவே). பாடலை முழுமையாக கேட்டு முடிக்கும் போது கடற்கரை வெயிலோடு, ஈரமான கடற்காற்றையும் சேர்த்து அனுபவித்தது போன்றதொரு உணர்வு. உங்களுக்கும் அப்படித்தானே...?

இதையும் சேத்துக்குங்கோ...

இந்த‌ பாடல் எனக்கு பிடித்தமைக்கு வரிகளை சிதைக்காத, மறைக்காத இசை வழங்கியிருந்த‌ மணிசர்மாவும், கவிஞரோடு சேர்ந்து வாழ்ந்திருந்த பாடகர் ஹரிஸ் ராகவேந்திராவும் கூட முக்கிய காரணங்கள்.

பாடலுக்கான காட்சிப்படுத்தலும் கூட வரிகளுக்கேற்ப‌ இருந்தது. ஒளிப்பதிவு, லொகேஷன் மற்றும் ரிச்சா பல்லோட்- அனைத்தும் சிறப்பாக இருந்தது. முக்கியமாக விஜய். அந்த‌ ஆர்ப்பாட்டமில்லாத நடன அசைவுகளும், அவருக்கேயுரிய குறும்பும், குழந்தைத்தனமும் கலந்த முகபாவனைகளும் -ஒரு ஹைக்கூ. (இப்ப‌ எங்க சார் போய்த்தொலஞ்சீங்க?)

இது என்னதான் அருமையான பாடலாக இருந்தபோதும் படத்தில் பெரிய‌ ஹிட் ஆனது என்னவோ 'சரக்கு வச்சிருக்கேன் எறக்கி வச்சிருக்கேன்' என்ற குத்துப் பாடல் தான். இதற்காக சமீபத்தில் கவிப்பேரரசு வைரமுத்து கூட 'இங்கே' கவலைப்பட்டிருந்தார்.

இதோ பாடல்.....

உன்னைப்போல் ஒருவனும், வேட்டைக்காரனும்!

2010-01-12T10:10:00.019+05:30

கூடையிலிருந்து நழுவி விழுந்த தக்காளியை பொறுக்கிக்கொண்டிருந்த உன்னைப் போல் ஒருவன் குதிரை கனைக்கும் சத்தத்தைக்கேட்டு தாடியை சொறிந்துக்கொண்டே நிமிர, இடுப்பில் ஒரு கை, கௌபாய் தொப்பி, பட்டன் தைக்காத சட்டை என வித்தியாசமான கெட்டப்பில் மணிக்கு 100 km வேகத்தில் குதிரையை, இல்லையில்லை குதிரையில் யாரையோ விரட்டிக்கொண்டு வந்தவர்.......ஆங் அவரே தான், வேட்டைக்காரன்!

'உ.போ.ஒ' ஐ பார்த்தவுடன் தன் முயற்சியை கைவிட்டுவிட்டு 'வே.கா', குதிரையிலிருந்து கீழே குதிக்க, தப்பினோம், பிழைத்தோம் என குதிரை கதறிக்கொண்டே ஓடி மறைகிறது.

வே.கா: வணக்கமுங்கண்ணா....

உ.போ.ஒ: ஆ.. நீங்களா, என்ன தோப்பியெல்லாம் வச்சு , பூப்போட்ட சட்டையெல்லாம் போட்டு அடையாளமே தெரியல.

வே.கா: இது தானுங்கண்ணா என்னோட புது கெட்டப்பு.
படம் பிச்சுக்கிட்டு ஓடுதே...இன்னும் பாக்கலீங்களாண்ணா?

உ.போ.ஒ: (சன் டி.விக்காரன் தொல்லதான் தாங்க முடியலன்னு வெளிய வந்தா, இங்கயுமா என முனகிக்கொண்டே) பார்க்கத்தான் போனேன். ஆனா பாதிலேயெ எழும்பி வந்துட்டேன். அதான் நீங்க போலிசாக ஆசைப்படுறதா யாரோ படத்துல சொல்லுவாங்களே, எங்க அப்படி எதும் நடந்துறப்போகுதோங்குற பயந்துல எழும்பிவந்துடேன்.

வே.கா: (சற்று கடுப்பாக) அது பாதி இல்லைங்கண்ணா, ஆரம்பமே அதான். நீங்களாவது பரவால்லைங்கண்ணா. நான் உ.போ.ஒ பார்த்து பாதிலயே தூங்கிட்டேன். ஒரு குத்து பாட்டு இல்ல, ஒரு டூயட் இல்ல...
அப்படி என்ன.....என்ன...என்ன சொல்ல வாறீங்க?
என்ன பாருங்க, என்னா பைட்டு, என்னா டான்ஸ்....அதுல பாருங்கண்ணா டைரக்டர் என் 'ச‌ன்'னும் என்னோட சேந்து நடிச்சா, இல்லல்ல‌ ஆடுனா 'நல்லாருக்குன்னு 'feel' பண்ணுனார். நானும் அடுத்த நாளே 'ச‌ன்'னோட போய் நிக்க என் கமிட்மென்ட‌ பாத்து அப்டியே ஆடி...ஆ..டி போய்ட்டாருங்கண்ணா...

கேட்டுக்கோண்டிருந்த உ.போ.ஒ வழிந்தோடிய‌ கண்ணீரை துப்பாக்கியாலே துடைக்க, வே.கா விடுவதாயில்லை

வே.கா: அதுல பாருங்கண்ணா, ட்ரயின்ல அனுஷ்காவோட லவ் சீன் ஒன்னு வச்சிருக்கோம், யூத் மனசையெல்லாம் அப்படியே டச் பண்ணிரும்...

உ.போ.ஒ உம் ஏதோ 'முத்த‌' சமாச்சாரமோ என 'அனுஷ்காவுக்கேவா' என்பது போல் கண்ணாடியை துடைத்துக் கொண்டு பார்க்க‌.

டிரயின்ல வச்சு அப்படியே அவ்ங்க வளையல திருடி, அத அவங்க ஞாபகச்சின்னமா வச்சிருக்கேன், ஆனா அத அவங்க கண்டுப்பிடுச்சுறாங்க. சீன் ரொம்ப வித்தியாசாமா இருக்கதா சன் டி.வில சொல்றாங்க‌. அநியாயத்தக் கண்டா வேட்டைக்காரன், அனுஷ்காவக் கண்டா சேட்டைக்காரன்னு ஒரு பன்ச் வச்சிருக்கணும் . Just misssuங்கண்ணா.

உ.போ.ஒஅதற்கு மேல் தாங்க‌ முடியாமல்,

நான் ஒரு காமன் மேனாக சொல்றேன், இந்த வேட்டையும் சேட்டையும் எத்தனை நாளைக்கு தமிழர் ரசிப்பாங்க‌? தமிழர் எல்லோரும் விரும்புற‌து உலகத்தரம். இதயே தான் கலைஞர் அய்யாவும் கடைசியா அவருக்கு நடந்த பாராட்டு விழாவுல சொன்னாரு.உலகத்தரம்னா டான்ஸும் பைட்டும் தேவ‌ல்ல. முதல்ல லாஜிக் இருக்கணும். மாறணும் எல்லாம் மாறணும்.

தொடங்கிட்டார்ரா இவரு, உலகத்தரம், உலக்கைத்தரம், லாஜிக், மேஜிக்கினுக்கிட்டு என முணுமுணுத்துக்கொண்டே வே.கா,

'அண்ணா, அங்க மட்டும் என்னங்கண்ணா லாஜிக் வாழுது. ஒரு தக்காளியக்கூட‌ விடாம பொறுக்குவீங்களாம். ஆனா லப் டாப்பு, மொபைல் எல்லாத்தயும் போட்டு கொளுத்துவிங்களாம். நல்ல காமன் மேனுங்கண்ணா நீங்க.'

உ.போ.ஒ: நா என்ன சொல்றேன்னா, காதுல இந்த மாதிரி சின்ன சின்னதா பூ சுத்தலாம், ஆனா உங்கள மாதிரி புடலங்காய சுத்தக்கூடாது. காதும் தாங்காது, கண்ணும் தாங்காது.
இப்ப பாருங்க, சும்மா இருந்த நிறைய பேர் உங்களால கண்ணுக் கெட்டுப்போய் விமர்சனம் எழுதுறேங்கற பேரில எழுதி, எழுதி இப்ப தூண், துரும்பு எல்லாத்திலயும் நீங்கத்தான் தெரியுறீங்க‌. கடைசியா விஜயகாந்த் சோன்ன புள்ளி விபரத்துல...
உங்களோட SMS ஜோக்‍ 189
உங்களோட E-MAIL ஜோக்‍ 216
வே.கா விமர்சனம் 1116, இதுல 1000த்துக்கு மேல நையாண்டி விமர்சனம்.
இதெல்லாம் தேவையா? இப்படியே போனா நான் காமன் மேன் ஆன மாதிரி நீங்க காமடி மேன் ஆகிடுவிங்க.

வே.கா: அரசியல் வாழ்க்கையில இதெல்லாம் சகஜங்கண்ணா. உங்களப்பத்தி கூடத்தான் டெல்லி கணேஸ் மாதிரி ஒருத்தர் நடிக்கவேண்டிய 'ரோல்'ல‌ நீங்க நடிச்சுட்டதா யாரோ ஒரு ஞானி நக்கலா சொல்லிருந்தாரே. வாசிக்கலயாங்கண்ணா...

உ.போ.ஒ: நான் விமர்சனங்களை படிப்பவன், விஷமத்தனங்களை அல்ல; விமர்சகர்க‌ளை மதிப்பவன், விஷமிகளை அல்ல. ஞானி என்பவன் முற்றுமுணர்ந்தவன். தன்னைத்தானே ஞானி என்று.....

அப்போது அங்கே வந்த ரசிகர் கூட்டம் உ.போ.ஒ ஐ அடையாளம் கண்டு சூழ்ந்துக்கொள்ள, கண்டுக்கப்படாததால் கடுப்பாகிய வே.கா அவருக்கேயுரிய பாணியில்

'ஹே, சைலன்ஸ்... பேசிக்கிட்டுருக்கோமுல்ல'.

என அலற, ரசிகர் கூட்டம் சிதறி ஓடுகிறது, காதில் வடிந்த இரத்தத்தை துடைத்துக்கொண்டே.

கண்களில் கொலைவெறியுடன் நின்ற வே.கா பார்த்து பயந்து சற்று தள்ளி நின்று உ.போ.ஒ தொடர்கிறார்...

'சரி அத விடுவோம். அடுத்ததா என்னப் பண்ணப்போறீங்க?'

வே.கா: அப்டி கேளுங்கண்ணா, அடுத்து என்னோட அவதாரம் சுறா...சண்டன்னு வந்தா சுறா; சாந்தமானா புறா. இது எப்டி இருக்கு
என கையையும், காலையும் உதறி ஏதோ சேய்து காட்ட‌...

உ.போ.ஒ: சுறாவோ, புறாவோ... ஒன்னு மட்டும் நிச்சயம், இப்பிடியே போனா உங்க ரெண்டு படத்தை வச்சு 'குறைந்தபட்சம் ஆறு வித்தியாசம் கண்டுபிடிக்க'ன்னு போட்டியே நடத்திடுவாங்க. .

வே.கா: அதுக்காக‌த்தாங்கண்ணா அதுல ரொம்ப வித்தியாசமா வழமையான‌ 3 நாள் தாடிய, 5 நாள் தாடியாக்கப்போறேன். அதோட சேர்ட்டே போடாம‌ வெறும் பனியனோட வரப்போறேன். பார்க்கிறவனெல்லாம் அப்படியே அதிரப்போறான். சுறாவக் கண்டு கை, கால் மட்டும் இல்ல 'த‌ல'யே நடுங்கப்போகுதுங்கண்ணா.

என்று சொல்லிமுடிக்கவும் உ.போ.ஒ துப்பாக்கி வெடிக்கவும் சரியாக இருந்தது.

தன்னைத்தானே சுட்டுக்கொண்டு உ.போ.ஒ சரிந்து விழுந்த பிறகும் கூட‌ வே.கா பன்ச் தொடர்கிறது.

'வேட்டைக்காரன் அடிச்சும் கொல்லுவான், கதச்சும் கொல்லுவான். அடுத்தது யாரு, வேற.....வேற........... '

சத்தத்தை கேட்டு மக்களோடு மக்களாக‌ நாய், பூனைகளும் சிதறி ஓட, பின்னால் ஒலிக்கிறது.

'ஏ...ஓடு, ஓடு, ஓடு, ஓடு வேட்டக்காரன் வாற‌தப் பாத்து...'

பி.கு: உ.போ.ஒ, வே.கா இரண்டு படங்களையும் பார்த்துவிட்டு என் மனதில் தோன்றிய எண்ணங்க‌ளின் பிரதிபலிப்பே இந்த சந்திப்பு. வேறு எந்த உள் நோக்கமும் இல்லை. முக்கியமாக மற்றவர்களைப்போல் 'வே.கா' ஐ நக்கலடிக்கும் நோக்கம் இல்லவே இல்லைங்கண்ணா. ஹி..ஹி...!

நெஞ்சுக்குள் பெய்திடும் மாமழை!

2009-12-09T16:48:00.007+05:30

பள்ளிக்காலம் முதல் இன்று வரை பல நண்பர்கள். வந்துசென்றவ‌ர் சிலர்; நின்று நிலைத்தவர் சிலர்...ஆனால் யாரும் நண்பராக இருந்து எதிரியாக ஆனதில்லை, இவர் ஒருவரைத்தவிர!
அப்போதெல்லாம் இவர் வந்துவிட்டால் போதும் பள்ளியாவது, பாடமாவது....வீட்டீல் ஒரே ஆட்டந்தான்..இப்போதோ இவர் வரும்போதே எப்படா ஒழிவார் என்றாகிவிட்டது. அவ்வளவு கடுப்பு இவர்மீது.
யாருக்கு இவ்வளவு 'பில்ட்-அப்'?

வேற யாரு, விடாக்கண்டன் 'Mr மழை' தான்!

அடைமழை அலுவலக பயணத்திற்கு அடிக்கடி ஆப்பு வைப்பதே இதற்கு மூல காரணமாக இருந்தபோதும் மழையின் அழகு கொழும்பில் துளியும் தெரிவதில்லை என்பதும் ஒரு காரணம். மாறாக மூடப்பட்ட வீதிகளையும், அடுக்கப்பட்ட பேருந்துகளையும், பாஸ்போர்ட் சைஸ் மனிதர்களையுந்தான் பார்க்கமுடிகிறது. ஆனால் ஒன்று, கொழும்பில் சந்து பொந்து வீதிகளை தெரிந்துக்கொள்ள வேண்டுமா? அடை மழையில் ஏறிக் குந்துங்கள் ஒரு பேருந்தில்! அதுவும் கோட்டை-‍ வத்தள மாதிரி பேருந்தென்றால் சொல்லவே வேண்டாம், இலவச சந்து, பொந்து சுற்றுலாவே நடத்துவார்க‌ள். ஆனால் என்ன, நீங்க போக‌வேண்டிய இடத்துக்கு தமிழ் சினிமா போலிஸ் மாதிரி தான் போக வேண்டியிருக்கும் (அதாங்க எல்லாம் முடிஞ்சதும் போய் சேருவாங்களே அவங்களே தான்).

அன்றும் அப்படித்தான். அலுவலக பயணம், அடை மழை....பேருந்து ஏதோ ஒரு குறுக்கு சந்தில் நுழைந்துக் கொண்டிருந்தது . இன்னைக்கும் த. சி. போலிஸ்தான்னு (நானாவது பரவாயில்லை பக்கத்தில் இருந்தவர் வாய்விட்டு புலம்பவே ஆரம்பித்திருந்தார்) செல்பேசி ரேடியோவை (அந்த ரணகளத்திளயும் ஒரு கிளுகிளுப்பு) காதில் மாட்டினேன்.

'நீங்கள் இணைந்திருப்பது வெற்றியின் விடியலோடு...'

வேறு யார், நம்ம லோஷன் அண்ணா தான்.
அன்றைய தலைப்பு என்னன்னு பார்த்தால்... ம்ஹும், கேட்டால்

'மழையைப் பற்றி ஒரு வரி!'

என்ன கொடும சார் இது, கண்லதான் மழைன்னா, காதுலயுமா? சரி, நம்மளும் யோசிப்பம் என்று (உக்காந்து) யோசித்ததில் ஒரு வரியல்ல, நிறையவே தோன்றியது. கூடவே இப்படி ஒரு பதிவிற்கான யோசனையும் கிடைத்தது. எனவே இந்த பதிவிற்கு வழி கோலிய மழைக்கும், லோஷன் அண்ணாவிற்கும் நன்றிகள்.

இதோ மழைத்துளிகள் இல்லையில்லை மழை வரிகள்.

மழை - தலைநகர வீதிகளின் தலைவலி‍.
(அப்போது இருந்த நிலைமையில் முதலில் தோன்றியது இதுதான்)

மழை - குடைகளின் அலுவலகம்

மழை - கிரிக்கெட்டின் துயரம் .

ஜொள்ளுக்காக ஒரு வரி
மழை - கவர்ச்சி நாயகிகளின் 'COMMON COSTUME'

லொல்லுக்காக ஒரு வரி
மழை - ஜெயம் ரவி, ஸ்ரேயா மற்றும் பலர்.
(அட, மழை திரைப்படம் பற்றி சொன்னேங்க.)

கடைசியாக.....

மழை
நனையும்போது குதூகலமாகத்தானிருந்தது‍ - அகதி முகாம்களின் நிலை நினைவிற்கு வரும் வரை!

நிலா எழுதிக்கொள்வது என்னவென்றால்.......

2009-11-18T12:11:00.002+05:30

கவிப்பேரரசே, கவி மார்க்கண்டேயரே,இன்னும் காதல் பாடும் ஏனைய கவிகளே என்ன நடந்தது உங்களுக்கெல்லாம்?
இப்பொழுதெல்லாம் உங்கள் பேனை என் பேரை எழுதுவதேயில்லையா?
கறுப்பு, வெள்ளை காலத்திலிருந்தே நானும் ஒரு கதாநாயகி என்பதை மறந்துவிட்டீர்களா?
நினைவில்லையா, அப்போதே காதல் ஊமையானபோது, என்னைத்தான் உவமையாக்கினார் உங்கள் மூத்தகவி 'நிலவே என்னிடம் நெருங்காதே...'என்று.

நீங்களும் கூட என்னை தொட்டுத்தழுவிக்கொண்டுதானே இருந்தீர்கள், கொஞ்ச காலத்துக்கு முன் வரை!
விஞ்ஞானமே வியந்து கொண்டிருந்த என்னை லாவகமாக பிடித்து, உங்கள் துணையிடம் மார்தட்டிக் கொண்டீர்கள் 'அந்த நெலாவத்தான் நா கையில பிடிச்சேன்..' என்று.
'என் இனிய பொன் நிலாவே...' என்று எனக்கு தங்க முலாம் வேறு பூசிவிட்டீர்கள்.
மன்றம் வந்தும், மஞ்சம் வர மறுத்த மனைவியிடம் ' நிலாவே வா...' என்று என்னை வைத்து மெளனராகம் இசைத்தீர்கள்.
காதலியை தொட்டுவிட்டு என்னையே தொட்டுவிட்டதாக ஆம்ஸ்ட்ரோங்கையே சண்டைக்கழைத்தனர்-உங்கள் 'ரட்சகர்கள்'!
என்னை விண்ணைத்தாண்டி வரச்சொல்லிவிட்டு,நண்பனின் காதலியோடு கைகோர்த்து விளையாடிக்கொண்டிருந்தார் உங்கள் நாயகன்-கண்களில் மின்சாரக்கனவுகளோடு!
'ஓ வெண்ணிலா, இரு வானிலா...' என்று என்னை துண்டு போட்டீர்கள் - காதல் தேசத்தில்!
இவ்வளவு ஏன், ' நிலா அது வானத்து மேலே...' என 'Item Song'க்குக்கூட என்னைத்தானே ஆடவிட்டீர்கள்-அரைகுறையாக!

இப்படி எத்தனை, எத்தனையோ...சொல்லப்போனால் என்னை காதலிக்காத உங்கள் கதாநாயகர்களே இருந்ததில்லை.
இப்பொழுதெல்லாம் என்ன நடந்தது உங்களுக்கு, உங்கள் கற்பனைக்கரம் என்னை வருடுவதேயில்லையே, உங்கள் பேனை என் பேரை எழுதுவதேயில்லையே...!
விஞ்ஞானம் கரடு, முரடாக என்னை படம்பிடித்துக் காட்டிவிட்டதால் உங்கள் கற்பனையும் , காதலும் என்னை புறந்தள்ளிவிட்டனவா?
வேண்டாம், நான் தேய்வதும், மறைவதும் வானில் மட்டுமாக இருக்கட்டும், உங்கள் கற்பனையில் என்னை மறைய, ஏன் தேயக்கூட விடாதீர்கள். ஏனென்றால் என்னைக் காதலிப்பதற்கு ஒரு கூட்டமே காத்துக்கிடக்கின்றது.

இனி மீண்டும் என்னை ஆடவிடுங்கள-உங்கள் டூயட்டில்,
வாடவிடுங்கள்-உங்கள் சோகத்தில்!
யார் கண்டது, அடுத்த தேசிய விருதைக்கூட நான் உங்களுக்கு வாங்கித்தரலாம்.

இப்படிக்கு
நிலா.

வலைப்பூவிற்கு ஓர் வணக்கம் !

2009-10-29T13:31:00.001+05:30

'தோ..வந்துட்டேன்' என்று எப்போதோ பிள்ளையார் சுழி போட்டு ஆரம்பித்திருக்க வேண்டியது. என்ன செய்ய‌, என்னதான் எழுதுவதில் ஆர்வம் இருந்தாலும் செய்யும் தொழிலுக்கும் எழுத்துக்கும் இடைவெளி அதிகமாகும்போது அடிக்கடி எழுதுவதென்பது எட்டாக்கனியாகின்றது. அதனாலேயே இப்படி ஒரு வலைப்பூவை தொடங்கும் ஆர்வத்தை , தொடங்கிய பிறகு அடிக்கடி எழுத முடியுமா? என்ற கேள்வியே அடிக்கடி விழுங்கிவிட்டது. ஆனாலும் அவ்வப்போது எழுதியவற்றை Facebook இல் பதிவிட்டிருந்தேன். உங்களில் சிலர் அவற்றை வாசித்தும் இருக்கலாம்.

ஆனால் இப்போதோ ஏதோ ஒரு உந்துதல், எப்படியும் வாரத்துக்கு ஒரு முறையாவது எழுதி உங்கள் உயிரை வாங்குவது....இல்லையில்லை, மனதை வாங்குவது என்று இதோ என்னையும் களத்தில் இறக்கிவிட்டது. 'கெளம்பிட்டாய்யா இன்னொருத்தன்' என்று நீங்கள் புலம்புவது கேட்காமலில்லை. கவலப்படாதிங்கப்பா...பிரயோசனமா இருக்குமா, இல்லையா? யாமறியோம். ஆனா கொஞ்சமாவது சுவாரஷ்யமா இருக்கும்னு நம்புறேன்.

அதுசரி அது என்ன 'புதுமை விரும்பிகளுக்கு' ன்னு பில்ட்-அப் எல்லாம் பலமா இருக்கேன்னு பாக்கிறீங்களா? உண்மை தான். நம்மில் யார் புதுமை விரும்பிகளாக இல்லாதிருக்க முடியும்? எல்லோரும் ஏதோ ஒன்றில் தெரிந்தோ, தெரியாமலோ புதுமையை வரவேற்கத்தானே செய்கின்றோம். டெஸ்ட் போட்டிகளிலிருந்து ஒரு நாள் போட்டிகளுக்கு குதித்தோம். இப்போது 20-20 (இதில் 'Cheerleaders' என்ற புதுமை வேறுகதை). Windows XPஇலிருந்து Windows Vista விற்கு தாவினோம் . இப்போதோ Windows 7. இப்படி எத்தனை, எத்தனையோ. இவ்வளவு ஏன், புதுமையை விரும்பி தானே குரங்கிலிருந்து தொடங்கி இன்று ஒரு ஒபாமாவாக, டென்டுல்கராக, கமலஹாசனாக, நீங்களாக, நானாக வந்து நிற்கின்றோம். எனவே நான் குறிப்பிட்டுள்ள புதுமை விரும்பிகள் வேறு யாருமல்ல, நான், நீங்கள், நாமனைவருமே (அப்பாடா...!)!

கடைசியாக, 'Well begin is half done' என்பார்கள். அப்படி ஒரு நல்ல தொடக்கத்தை தந்துள்ளேன் என்ற நம்பிக்கையுடனும், உங்கள் மேலான பின்னூட்டல்கள் அடியேனின் பேனையை மீள் நிரப்பும் என்ற எதிர்ப்பார்ப்புடனும், அடுத்த பதிவு வரும் வரை - Bi.